आदर्श लघुवित्तको सेयर कारोबार रोक्का

काठमाडौं । आदर्श लघुवित्त वित्तीय संस्थाको सेयर कारोबार रोक्का भएको छ । नेपाल स्टक एक्सचेन्ज लिमिटेडका अनुसार बैंक तथा वित्तीय संस्था गाभ्ने तथा गाभिनेसम्बन्धी विनियमावली २०७३ बमोजिम आर्दश लघुवित्त वित्तीय संस्थालाई डिप्रोक्स लघुवित्त वित्तीय संस्थाले प्राप्ती गरेकाले आर्दश लघुवित्त वित्तीय संस्था लिमिटेडको दोस्रो बजार कारोबार यही असोज २३ गतेदेखि रोक्का राखिएको हो ।

संस्थाले आर्थिक वर्ष २०७८–०७९ मा ६८ लाख ९३ हजार रुपैयाँ खुद मुनाफा आर्जन गरेको छ । अघिल्लो आवमा भने संस्थाको यस्तो नाफा छ लाख ९९ हजार रुपैयाँ रहेको थियो ।  हाल चुक्ता पुँजी दुई करोड सात लाख रुपैयाँ रहेको संस्थाले आर्थिक वर्ष २०७८–०७९ मा १४ करोड ५३ लाख ६९ हजार रुपैयाँ निक्षेप संकलन गरी २७ करोड ७३ लाख ८६ हजार रुपैयाँ कर्जा प्रवाह गरेको छ । सो अवधिमा एक करोड ७५ लाख ३९ हजार रुपैयाँ खुद ब्याज आम्दानी गरेको संस्थाको प्रोभिजन रकम नौ लाख ५७ हजार रुपैयाँ रहेको छ भने निष्क्रिय कर्जाको अनुपात एक दशमलव शून्य छ प्रतिशत रहेको छ ।

अघिल्लो आवमा भने संस्थाले ११ करोड ९० लाख २३ हजार रुपैयाँ निक्षेप संकलन गरी २३ करोड १४ लाख ३५ हजार रुपैयाँ कर्जा प्रवाह गरेको थियो । उक्त अवधिमा एक करोड ५३ लाख २३ हजार रुपैयाँ खुद ब्याज आम्दानी गरेको संस्थाको प्रोभिजन रकम २० लाख ६३ हजार रुपैयाँ रहेको थियो भने निष्क्रिय कर्जाको अनुपात एक दशमलव ३३ प्रतिशत रहेको थियो ।