नबिल बैंक वित्तीय क्षेत्रमा सबैभन्दा बढी कर तिर्ने बैंकको रूपमा सम्मानित

काठमाडौं । नबिल बैंकले वित्तीय क्षेत्रमा सबैभन्दा बढी कर तिर्ने बैंकको रूपमा सम्मान पाएको छ । आर्थिक वर्ष २०७७/७८ मा बैंक तथा वित्तीय संस्थाहरूमध्ये सबैभन्दा बढी कर दाखिला गर्ने नबिललाई आन्तरिक राजस्व विभागले सम्मानित गरेको हो ।

राष्ट्रिय कर दिवसको अवसर पारेर विभागले प्रदान गरेको सम्मानपत्र बैंकका तर्फबाट प्रमुख कार्यकारी अधिकृत ज्ञानेन्द्र प्रसाद ढुंगानाले ग्रहण गरेका थिए । बैंकले उक्त आर्थिक वर्षमा दुई अर्ब ७९ करोड रूपैयाँबराबरको कर तिरेको थियो । पछिल्लो १० वर्षमा नबिल बैंक वित्तीय संस्थामा उच्च कर भुक्तानी गरेर सम्मानित भएको यो सातौँ पटक हो ।

नबिल हरेक तवरले अग्रणी स्थानमा रहेको बताउँदै प्रमुख कार्यकारी ढुंगानाले वित्तीय संस्थाहरूमध्ये सबैभन्दा बढी कर दाखिला गरी राज्यको वृद्धि विकासमा टेवा पु-याउन पाउँदा खुशी बताएका छन् । निजी क्षेत्रको अग्रणी बैंक नबिलले २०७७/७८ सम्म राज्यलाई १८ अर्ब ३८ करोड रूपैयाँ कर बुझाएको जानकारी पनि बैंकले दिएको छ ।