अर्थतन्त्र सुधारोन्मुख भएको गभर्नर अधिकारीको दाबी

काठमाडौं । नेपाल राष्ट्र बैंकका गभर्नर महाप्रसाद अधिकारीले अर्थतन्त्र सुधारोन्मुख भएको दाबी गरेका छन् । नेपाल आर्थिक पत्रकार समाज (सेजन)को बिहीबार सम्पन्न भएको २६औँ वार्षिकउत्सवको अवसरमा बोल्दै गभर्नर अधिकारीले उक्त दाबी गरेका हुन् ।

‘पछिल्लो समय विदेशी मुद्राको सञ्चिति बढ्दै गएको छ, विगतमा घाटामा रहने गरेको शोधनान्तर स्थिति बचतमा रहेको छ, यस्तो हुनु भनेको अर्थतन्त्र सुधारोन्मुख दिशामा जानु हो’, उनले भने । गभर्नर अधिकारीले गत आर्थिक वर्षमा ८८ अर्ब रूपैयाँ घाटामा रहेको अहिले छ अर्ब रूपैयाँ बचतमा रहेको जानकारी दिए । वाार्षिक विन्दुगत आधारमा उपभोक्ता मूल्य सूचकांकमा आधारित मुद्रास्फीति आठ दशमलव ५० प्रतिशत रहेको छ, आयात १६ दशमलव दुई प्रतिशतले, निर्यात ३५ दशमलव सात प्रतिशतले र कुल वस्तु व्यापारघाटा १३ दशमलव एक प्रतिशतले घटेको गभर्नर अधिकारीले बताए ।

यो अवस्थामा विप्रेषण आप्रवाह नेपाली रूपैयाँमा १६ दशमलव आठ प्रतिशतले र अमेरिकी डलरमा सात दशमलव नौ प्रतिशतले बढेको उनले बताए । चालू आर्थिक वर्षको पछिल्लो तीन महिनामा अवधिमा शोधनान्तर स्थिति १२ अर्ब ४३ करोडले बचतमा रहेको जानकारी पनि गभर्नर अधिकारीले दिए ।