मुक्तिनाथ विकास बैंकद्वारा कृषिलाई सम्मानित पेसा बनाउन अभियान सुरु

काठमाडौं । मुक्तिनाथ विकास बैंकले कृषि पेसालाई सम्मानित पेसा बनाउनको लागि अभियान सुरु गरेको छ । बैंकले बहुउद्देश्यीय कृषि सहकारीमार्फत किसानलाई सहभागी गराई उद्यमशीलता विकास गर्ने र कृषि पेसालाई सम्मानित पेसाको रूपमा विकसित गराउने अभियान सुरु गरेको जानकारी दिएको छ ।

बैंकका अनुसार यो अभियानअन्तर्गत पहिलो चरणमा स्याङ्जा, कास्की, तनहुँलाई केन्द्रविन्दु बनाएर कार्य थालनी गरिनेछ । स्याङ्जाको हरिनाश गाउँपालिकामा दग्दी मुक्तिनाथ बहुद्देश्यीय कृषि सहकारी संस्था, कास्कीको माछापुच्छ«े गाउँपालिकामा माछापुच्छ«े मुक्तिनाथ बहुउद्देश्यीय कृषि सहकारी संस्था र तनहुँको भानु नगरपालिकामा मिर्लुङकोट मुक्तिनाथ बहुउद्देश्यीय कृषि सहकारी संस्थामार्फत भेलाको आयोजना गरी तदर्थ समिति गठन गरी स्थानीयस्तरमा सहकारी दर्ता प्रक्रिया अघि बढाइएको बैंकले जानकारी दिएको छ ।

मुक्तिनाथ विकास बैंक तथा मुक्तिनाथ कृषि कम्पनीका अध्यक्ष भरतराज ढकालको अध्यक्षतामा आयोजित भेलामा सम्बन्धित स्थानीय तहका प्रमुख, उपप्रमुख, वडाअध्यक्ष, कृषक, उद्यमीलगायत स्थानीय बासिन्दाको सहभागिता जनाएको बैंकले जनाएको छ । कार्यक्रममा मुक्तिनाथ विकास बैंकको तर्फबाट समुदायस्तरीय सहकारी शिक्षा र मुक्तिनाथ कृषि कम्पनीको तर्फबाट कृषि प्रविधि हस्तान्तरण साक्षरता प्रशिक्षण पनि सञ्चालन गरिएको गरिएको थियो । बैंकका अनुसार प्रशिक्षणको सहजीकरण मुक्तिनाथ विकास बैंकका सन्तोष रोका र मुक्तिनाथ कृषि कम्पनीका भूमिराज भण्डारीले गरेका थिए ।