ई–सेवामार्फत बीमाको प्रिमियम भुक्तानी गर्दा २५ हजारको मोबाइल पाइने

काठमाडौं, फागुन २८
ई–सेवामार्फत बीमाको प्रिमियम भुक्तानी गर्दा २५ हजार रूपैयाँबराबरको मोबाइल पाइने भएको छ । जीवन बीमाको प्रिमियम अनलाइनबाट भुक्तानी गर्नलाई प्रोत्साहन गर्ने उद्देश्यका साथ ई–सेवाले आकर्षक उपहार योजना सार्वजनिक गरेको हो । उपहार योजनामा कुनै पनि जीवन बीमाको प्रिमियम ई–सेवाबाट भुक्तानी गर्दा प्रतिकारोबार सय रूपैयाँसम्म कमाउनुको साथै २५ हजार रूपैयाँबराबरको मोबाइल जित्न सकिनेछ । यस योजनाअन्तर्गत एक महिनामा २० देखि ४९ वटा बीमाका प्रिमियम भुक्तानी गर्नेले प्रति कारोबार ५०, ५० देखि ९९ वटासम्म प्रिमियम भुक्तान गर्ने व्यक्तिले प्रतिकारोबार ७५ तथा सयवटा भन्दामाथि कारोबार गर्नेले प्रतिकारोबार सय रूपैयाँ इन्सेन्टिभ पाउनेछन् ।

यो योजना एजेन्ट नेटवर्क तथा व्यक्तिगत एकाउन्ट दुवैमा लागू हुनेछ । यो योजना १, मार्च २०२० देखि जुलाइ ३१ सम्मलागू हुनेछ । यस योजनाको इन्सेन्टिभ रकम हरेक महिना गणना हुने र आगामी महिनाको २ हप्ताभित्र ग्राहकको ई–सेवा खातामा उपलब्ध गराइनेछ । पाँच महिनाको अवधिमा कोही पनि ग्राहकले पाँच सयवटा लाइफ इन्स्योरेन्सको भुक्तानी गर्न सफल भएमा प्रतिकारोबार सय इन्सेन्टिभका साथै २५ हजार रूपैयाँबराबरको मोबाइलसमेत प्राप्त गर्न सक्नेछन् । पछिल्ला दिनमा अनलाइनबाट बीमाको प्रिमियम भुक्तानी गर्नेको संख्या बढ्दै गएकोमा यसलाई अझ प्रोत्साहन गर्न यो योजना सञ्चालन गरिएको हो ।

ई–सेवामार्फत मोबाइल, टेलिफोन, इन्टरनेट, बिजुली तथा खानेपानीको महशुल भुक्तानी, रिचार्ज, हवाइजहाज, बसको टिकट, स्कुल कलेजको शुल्कलगायतका दुई हजारभन्दा बढी सेवाहरूको शुल्क भुक्तानी गर्न सकिन्छ । ई–सेवामा हाल ४९ वटा बैंक तथा वित्तीय संस्था सदस्य रहेका छन् । यी बैंकबाट ई–सेवामा सहजै रकम जम्मा गर्न तथा ई–सेवाबाट बैंक खातामा रकम पठाउन सकिने जानकारी कम्पनीले दिएको छ ।