सहकारी बैंकका जिम्मेवारी तोकियो, सूचना सञ्चार उपसमितिको संयोजकमा जिसी

काठमाडौं । राष्ट्रिय सहकारी बैंक लिमिटेडको १९औँ वार्षिक साधारणसभाबाट निर्वाचित सञ्चालक समितिका सदस्यहरूको जिम्मेवारी तोकिएको छ । बैंकको शनिबार सम्पन्न बैठकले सञ्चालकहरूलाई विभिन्न १० वटा उपसमिति र प्रदेश संयोजकको जिम्मेवारी तोेकेको हो  ।

बैंकको कामलाई प्रभावकारीरूपमा सम्पन्न गर्नका लागि विभिन्न उपसमितिहरू गठन गरिँदै आएको छ, केन्द्रीय उपसमितिको संयोजक बैकका सञ्चालकहरू रहने र सदस्यहरूमा सञ्चालकसहित बैंकका सदस्य संघसंस्थाका प्रतिनिधिहरू रहने व्यवस्था गरिएको बैंकका अध्यक्ष केबी उप्रेतीले जानकारी दिए । सहकारी विभाग र नेपाल राष्ट्र बैंकबाट समिति÷उपसमिति गठनसम्बन्धी निर्देशन, बैंकको स्वीकृत विनियममा भएको व्यवस्थाका आधारमा बैंकको काम कारबाहीलाई प्रभावकारीरूपमा सञ्चालन गर्न, बैंकको तोकिएका उद्देश्य प्राप्त गर्न, बैंकको व्यवसाय विस्तार, सदस्य सहकारी संस्थाको विकास तथा प्रवर्द्वनमा सहयोग गर्न उपसमिति गर्ने व्यवस्था गरिएको अध्यक्ष उप्रेतीले जानकारी दिए । सञ्चालक समितिले सूचना, सञ्चार, प्रकाशन तथा प्रविधि उपसमितिको संयोजकमा राम बहादुर जिसी, सम्पत्ति शुद्धीकरण अनुगमन उपसमितिको संयोजकमा अमृता सुब्बा, कर्मचारी सेवा सुविधा उपसमितिको संयोजकमा पार्वती थापा, नीति निर्माण कार्यक्रम उपसमितिको संयोजकमा केदार मानन्धरलाई चयन गरेको छ ।

यस्तै लघुवित्त तथा उद्यम उपसमितिको संयोजकमा महेन्द्र कुमार गिरी, शिक्षा, तालिम तथा सम्मान उपसमितिको संयोजकमा माधवलाल देवकोटा, घरेलु तथा साना उद्योग विकास उपसमितिको संयोजकमा शिवा थापा, लैङ्गिक समानता उपसमितिको संयोजकमा तारा गुरुङ, व्यवसाय प्रवद्र्धन, एकीकरण तथा स्तरीकरण उपसमितिको संयोजकमा मनोज कुमार थापा र जोखिम व्यवस्थापन उपसमिति संयोजकमा ध्रुवराज विष्टलाई चयन गरिएको छ । सातवटा प्रदेशका तर्फबाट निर्वाचित सञ्चालकहरूलाई प्रदेश प्रतिनिधि (संयोजक)को जिम्मेवारी दिइएको छ ।

प्रदेश संयोजकहरूमा प्रदेश नं १ मा महेन्द्र कुमार गिरी, मधेश प्रदेशमा विश्वनाथ मण्डल, बाग्मती प्रदेशमा रामहरि बजगाई, गण्डकी प्रदेशमा राम बहादुर जिसी, लुम्बिनी प्रदेशमा विजया धिताल, कर्णाली प्रदेशमा काली बहादुर महतारा तथा सुदूरपश्चिम प्रदेशमा शिवा थापा रहेका छन् । केन्द्रीय उपसमितिका सदस्यहरू तथा प्रदेशस्तरीय उपसमिति र शाखास्तरीय उपसमितिका संयोजक तथा सदस्यहरू बैंकका सञ्चालक तथा सदस्य संघ संस्थाका प्रतिनिधिहरूलाई चयन गरिने बैंकका प्रमुख कार्यकारी अधिकृत बद्रीकुमार गुरागाईले जानकारी दिए । बैंकको गत पुस १८ गते सम्पन्न १९औँ वार्षिक साधारणसभाबाट केबी उप्रेतीको अध्यक्षतामा १५ सदस्यीय सञ्चालक समिति र लक्ष्मी प्रसाद उप्रेतीको संयोजकत्वमा तीन सदस्यीय लेखा सुपरीवेक्षण समिति चयन भएको थियो ।