सिद्धार्थ र प्रिमियर इन्स्योरेन्सको एकीकृत कारोबार सुरु

काठमाडौं । सिद्धार्थ इन्स्योरेन्स र प्रिमियर इन्स्योरेन्सको एकीकृत कारोबार सुरु भएको छ । विसं २०५१/०१/२९ गते बाट सञ्चालनमा आएको प्रिमियर इन्स्योरेन्स कम्पनी (नेपाल) लि. र विसं २०६३/०१/०१ बाट सञ्चालनमा आएको सिद्धार्थ इन्स्योरेन्स कम्पनी लिमिटेडले विधिवत्रूपमा मर्जर भई सिद्धार्थ प्रिमियर इन्स्योरेन्स लिमिटेडको नामबाट एकीकृत कारोबार सञ्चालन गरेका हुन् ।

नेपाल बीमा प्राधिकरणका अध्यक्ष सूर्य प्रसाद सिलवालले एक समारोहका बीच एकीकृत कारोबार शुभारम्भ गरेका हुन् । मर्जरपछि बनेको नयाँ कम्पनीका अध्यक्षमा सुरेशलाल श्रेष्ठ र प्रमुख कार्यकारी अधिकृतमा वीरेन्द्र बहादुर वैदवार क्षेत्री नियुक्त भएका छन् । दुवै बीमा कम्पनी १ः१ समान सेयर अनुपातमा एक आपसमा मर्जर भएपश्चात् बन्ने सिद्धार्थ प्रिमियर इन्स्योरेन्स लिमिटेडको चुक्ता पुँजी दुई अर्ब ८० करोडभन्दा बढी हुने छ भने बीमा कोषमा दुई अर्ब ३४ करोडभन्दा बढी छ । यसैगरी कम्पनीको कुल सम्पति १० अर्ब २५ करोड छ भने बजार पुँजीकरण १८ अर्ब २३ करोड पुगेको छ । कम्पनीद्वारा जारी गरिएको बीमालेख संख्या चार लाख १७ हजार एक सय ८२ रहेको छ । कम्पनीले एक सय २५ वटा शाखा सञ्जालमार्फत सेवा प्रदान गर्दै आएको छ ।