Techie IT
आजको आर्थिक दैनिक

Aarthik Dainik

An Economic Newsportal

गृहपृष्ठबैंक बित्त बजारएक सय ८३ वटा बैंक तथा फाइनान्सको इजाजत खारेज

एक सय ८३ वटा बैंक तथा फाइनान्सको इजाजत खारेज


काठमाडौं । एक सय ८३ वटा बैंक तथा फाइनान्स कम्पनीहरुको अनुमति खारेज भएको छ । नेपाल राष्ट्र बैंकका अनुसार चालू आर्थिक वर्षको माघ मसान्तसम्ममा वाणिज्य बैंक, विकास बैंक, फाइनान्स र लघुवित्त वित्तीय संस्था समेत गरी कुल दुई सय ५५ वटा बैंक तथा वित्तीय संस्थाहरु मर्जर तथा प्राप्ति प्रक्रियामा सामेल भएकै कारण उक्त परिमाणमा संस्थाहरु खारेज भएका हुन् ।

यसरी खारेज हुने बैंक तथा वित्तीय संस्थाहरुमा तत्कालीन किष्ट बैंक, एपेक्स डेभलपमेन्ट बैंक, प्रभु फाइनान्स, एनआईसी बैंक, बैंक अफ एसिया नेपाल लिमिटेड, सीएमबी फाइनान्स, सोसियल डेभलपमेन्ट बैंक, कन्ट्री डेभलपमेन्ट बैंक, ग्राण्ड बैंक, भिवोर विकास बैंक आदि छन् ।

वित्तीय स्थायित्व सुदृढीकरण गर्ने उद्देश्यले बैंक तथा वित्तीय संस्था गाभ्ने, गाभिने तथा प्राप्तिसम्बन्धी प्रक्रिया सुरु गराएपश्चात् २०७९ माघ मसान्तसम्ममा कुल दुई सय ५५ वटा बैंक तथा वित्तीय संस्था मर्जर तथा प्राप्ति प्रक्रियामा सामेल भएको र यसमध्ये एक सय ८३ वटा संस्थाको इजाजत खारेज हुन गई कुल ७२ वटा संस्था मात्र कायम हुनपुगेको नेपाल राष्ट्र बैंकले जानकारी दिएको छ । चालू आर्थिक वर्षको पुस मसान्तमै ग्लोबल आईएमई बैंक र बैंक अफ काठमाडौं, नेपाल इन्भेष्टमेन्ट बैंक र मेगा बैंक, कुमारी बैंक र नेपाल क्रेडिट एण्ड कमर्स बैंक, प्रभु बैंक र सेञ्चुरी कमर्सियल बैंक तथा हिमालयन बैंक र सिभिल बैंकले मर्जर तथा प्राप्तिमार्फत एकीकृत कारोबार सुरु गरेका कारण पनि पछिल्लो समय बैंक तथा फाइनान्स कम्पनीहरुको संख्या घटेको हो ।

सो अनुसार यस अवधिमा बैंक तथा वित्तीय संस्थाहरुको कुल संख्या एक सय २५ वटा कायम भएको छ । जसमध्ये २२ वटा वाणिज्य बैंक, क्षेत्रीय र राष्ट्रियस्तरका समेत गरी १७ वटा विकास बैंक, १७ वटा फाइनान्स कम्पनी, ६४ वटा लघुवित्त वित्तीय संस्था र एउटा पूर्वाधार विकास बैंक सञ्चालनमा रहेको राष्ट्र बैंकले जानकारी दिएको छ ।

सञ्चालनमा रहेका २२ वटा वाणिज्य बैंकहरुले भने सात सय ५२ स्थानीय तहमा शाखा विस्तार गरेका छन् । नेपाल राष्ट्र बैंकले सार्वजनिक गरेको देशको वर्तमान आर्थिक तथा वित्तीय अवस्थासम्बन्धी चालू आर्थिक वर्षको पछिल्लो साात महिनाको विस्तृत प्रतिवेदनअनुसार सातवटा प्रदेशका सात सय ५३ स्थानीय तहमध्ये अब वाणिज्य बैंकहरुको शाखा पुग्न बाँकी रहेको स्थानीय तहको संख्या एउटा मात्र रहेको छ ।

यस अवधिमा बैंक तथा फाइनान्स कम्पनीहरुको कुल शाखा संख्या भने ११ हजार छ सय ११ पुगेको छ । जसमध्ये वाणिज्य बैंकहरुको कुल शाखा संख्या पाँच हजार ४५, विकास बैंकहरुको एक हजार एक सय २८, फाइनान्स कम्पनीहरुको दुई सय ८१ र लघुवित्त वित्तीय संस्थाहरुको पाँच हजार एक सय ५७ वटा शाखाहरु सञ्चालनमा छन् । यसअघि अर्थात् २०७९ असार मसान्तसम्ममा बैंक तथा फाइनान्स कम्पनीहरुको कुल शाखा संख्या ११ हजार पाँच सय २८ रहेको थियो ।


क्याटेगोरी : बैंक बित्त बजार
ट्याग : #Page 1

तपाईको प्रतिक्रिया