प्रभु क्यापिटलको तालिम

काठमाडौं । विश्व लगानीकर्ता सप्ताह–२०२३ को अवसरमा प्रभु क्यापिटलले युवाकेन्द्रित वित्तीय सचेतामूलक कार्यक्रम र काठमाडौं बहिरा संघका सदस्यहरूलाई सेयरबजारसम्बन्धी तालिम सम्पन्न गरेको छ ।

काठमाडौंको मैतिदेवीस्थित युनिभर्सल कलेजमा बीबीए अध्ययनरत विद्यार्थीहरूलाई गत शुक्रबार सेयर बजारसम्बन्धी आधारभूत प्रशिक्षण दिएको थियो । कार्यक्रममा कलेजका ५० भन्दा बढी विद्यार्थीहरूको उपस्थिति रहेको थियो । सो कार्यक्रममा प्रभु क्यापिटलका योजना व्यवस्थापक सौगात पन्तले प्राथमिक तथा दोस्रो बजारसम्बन्धी आधारभूत पक्ष र बजारमा लगानी गर्दा हुने फाइदाबारे प्रशिक्षण दिएका थिए ।

यस्तै क्यापिटलले गत शनिबार काठमाडौं बहिरा संघका सदस्यहरूलाई सेयरबजारसम्बन्धी तालिम दिएको छ । काठमाडौं बहिरा संघ नेपालको सहयोगमा सेयर बजारसम्बन्धी एकदिने आधारभूत तालिम कार्यक्रम सम्पन्न गरिएको क्यापिटलले जनाएको छ ।

हात्तिसारस्थित नेपाल हाउसमा भएको कार्यक्रममा ५० भन्दा बढीको सहभागिता थियो । क्यापिटलका प्रमुख लगानी अधिकृत दुर्गानन्द झा तथा श्रीया कुटुले प्रशिक्षण दिएका थिए । सांकेतिक भाषामा दोभाषेहरू रेनु शाह तथा सुनिता श्रेष्ठले प्रस्तुत गरेका थिए ।

यस कार्यक्रमले सहभागीहरूलाई पुँजीबजारमा प्रवेश गरी कारोबार गर्न, मेरो सेयर एप प्रयोग गर्न र सेयर बजारसम्बन्धी सूचनाको स्रोत थाहा पाउने विषयमा जानकारी गराइएको क्यापिटलले जनाएको छ ।

कार्यक्रममा सहभागीहरूले तालिमले सेयर बजारमा लगानी गरी आर्थिक उपार्जन गर्न सघाउने बताए । आगामी दिनमा अझै विस्तृत रूपमा तालिम प्राप्त गर्न सके आफूहरू पनि नेपालको सेयर बजारामा अभ्यस्त भई नाफा कमाउन सक्ने विश्वास बढेको सहभागीहरूले बताए ।