फोन–पे र सुलभ–पेबीच भुक्तानी सहकार्य

काठमाडौं । नेपालको अग्रणी भुक्तानी प्रणाली सञ्चालक फोन–पे नेटवर्क लिमिटेड र भुक्तानी सेवा प्रदायक सुलभ–पे (एनक्यास) वालेटबीच सहकार्य सुरु भएको छ । सोमबार राजधानीमा एक कार्यक्रमको आयोजना गरी फोन–पे र सुलभ–पेबीच भुक्तानीपत्रमा सम्झौता भएको हो ।

सम्झौतापत्रमा फोन–पेका तर्फबाट प्रमुख कार्यकारी अधिकृत (सीईओ) दिवस कुमार सापकोटा र सुलभपेका तर्फबाट सुलभ–पे (एनक्यास)का प्रमुख कार्यकारी अधिकृत (सीईओ) समल बुढाथोकीले हस्ताक्षर गरेका छन् । सम्झौतासँगै सुलभ–पे पूर्ण स्क्यान भुक्तानी सेवाहरू सुरु गर्ने पहिलो वालेट बनेको छ ।

सम्झौता कार्यक्रममा बोल्दै फोन–पेका सीईओ सापकोटाले सम्झौताले नेपाली समाजलाई क्यास लेस बनाउन महत्वपूर्ण भूमिका खेल्ने बताए । यस्तै सुलभ–पेका सीईओ बुढाथोकीले फोन–पे क्युआरलगायत एनक्यासद्वारा प्रदान गरिएका स्क्यान र पे सेवाहरूले नेपालको भुक्तानी सेवालाई थप सुरक्षित बनाउने बताए । यो सहकार्यबाट नेपालको फिनटेक उद्योग र डिजिटल कारोबारमा ठूलो उपलब्धि हुने अपेक्षा गरिएको छ । फोन–पेमा हाल ११ लाखभन्दा धेरै क्युआर मर्चेन्ट रहेका छन् । ६० भन्दा बढी बैंक तथा वित्तीय संस्था आबद्ध रहेका छन् । एक करोड ७० लाखभन्दा धेरै मोबाइल बैंकिङ प्रयोगकर्ता तथा भुक्तानी प्रणाली सेवा प्रदायकका मोबाइल एप्समार्फत फोन–पेले सेवा पु-याउँदै आएको छ ।

नेपाललाई क्यासलेस बनाउने योजनाअनुसार ‘नगद छोडौँ, फोन–पे गरौँ’ भन्ने नारासहित तीन वर्ष अगाडि स्थापना भएको फोन–पेमा छोटो समयमै आकर्षण बढेको छ । फोन–पे नेटवर्कमार्फत हाल दैनिक करिब पाँच अर्ब रुपैयाँको कारोबार हुँदै आएको छ । नेपाल राष्ट्र बैंकबाट भुक्तानी प्रणाली सञ्चालकको अनुमति प्राप्त फोन–पे पेमेन्ट सर्भिस लिमिटेड एफवान सफ्ट ग्रुपको सहायक कम्पनी हो ।