नबिल बैंकको क्यालेन्डर सार्वजनिक

काठमाडौं । ‘जलवायु परिवर्तनसम्बन्धी सचेतना तथा पर्यावरण प्रवद्र्धनप्रति दायित्वबोध’ मुख्य नाराका साथ नबिल बैंकले नयाँ वर्ष २०८० सालको नयाँ क्यालेन्डर सार्वजनिक गरेको छ । बैंकका प्रमुख कार्यकारी अधिकृत ज्ञानेन्द्रप्रसाद ढुंगाना, वरिष्ठ नायब प्रमुख कार्यकारी अधिकृत सुजितकुमार शाक्यलगायत नायब प्रमुख कार्यकारी अधिकृतद्वय विनयकुमार रेग्मी तथा भुपेन्द्र पाण्डेले भित्तेपात्रो र टेबल क्यालेन्डर सार्वजनिक गरेका हुन् ।

बैंकले क्यालेन्डरमा नेपाली १२ महिनाको मौसम तथा प्राकृतिक सौन्दर्यलाई दर्शाउने फोटोहरू राखिएको जनाएको छ । ढकमक्क फुलेका लालीगुराँसका मनोरम दृश्य, चराचुरुङ्गी, हिमालहरू, लोपोन्मुख हिम चितुवाको तस्बिर प्रयोग गरिएको छ । बैंकले तस्बिरको लागि अन्तर्राष्ट्रिय एकीकृत पर्वतीय विकास केन्द्र (इसिमोड)सँग सहकार्य गरेको थियो ।

क्यालेन्डरमा जलवायु परिवर्तनसम्बन्धी सचेतना राखिनुको विषयमा प्रकाश पार्दै नबिल बैंकका अध्यक्ष उपेन्द्रप्रसाद पौड्यालले भने, ‘जलवायु परिवर्तनलाई बैंकिङलगायत सबै क्षेत्रबाट गम्भीरतापूर्वक ध्यान पु¥याउन जरुरी छ ।’ उनले थपे, ‘जलवायु क्षेत्रमा उपयुक्त लगानी गरी यस संसारलाई सबैको लागि बाँच्नयोग्य बनाउनु नै अहिलेको प्रमुख आवश्यकता हो ।’

नबिल बैंकको यस कदमले सम्पूर्ण बैंकका कर्मचारी, सरोकारवाला, ग्राहक वर्ग, सञ्चालक समितिलगायत सम्पूर्ण जनतामा जलवायु परिवर्तनसम्बन्धी सचेतना फैलाउन र जीवनशैलीमा स–साना परिवर्तन गर्न अभिप्रेरित गर्ने सीईओ ढुंगानाले बताए । नबिलले दिगो बैंकिङको अवधारणालाई आत्मसात् गरी आएको र वातावरणप्रति सदैव जिम्मेवार रहेको उनले बताए । नयाँ वर्षको सुरुवातसँगै भित्तेपात्रो देशैभर रहेका शाखाहरूबाट कर्मचारी, ग्राहक, सरोकारवाला सबैमा पु¥याउने योजना रहेको बैंकले जनाएको छ ।