नेपाल फाइनान्सको नाफा एक करोड तीन लाख

काठमाडौं । नेपाल फाइनान्सले चालू आर्थिक वर्षको तेस्रो त्रैमासमा एक करोड तीन लाख ३५ हजार रुपैयाँ खुद मुनाफा कमाएको छ । गत आर्थिक वर्षको सोही अवधिमा फाइनान्सको नाफा तीन करोड २० लाख ६६ हजार रुपैयाँ थियो ।

७२ करोड ७२ लाख ९८ हजार रुपैयाँ चुक्ता पुँजी रहेको फाइनान्सले चालू आवको तेस्रो त्रैमासमा एक अर्ब ६६ करोड ४२ लाख ४० हजार रुपैयाँ निक्षेप संकलन गरी एक अर्ब २० करोड ८२ लाख रुपैयाँ कर्जा प्रवाह गरेको छ । यो अवधिमा छ करोड ७० लाख ४९ हजार रुपैयाँ खुद ब्याज आम्दानी गरेको छ । गत आवको सोही अवधिमा फाइनान्सले एक अर्ब ४७ करोड ४२ लाख दुई हजार रुपैयाँ निक्षेप संकलन गरी ९८ करोड छ लाख ५७ हजार रुपैयाँ कर्जा प्रवाह गरेको थियो ।

फाइनान्सको निष्क्रिय कर्जा गत आर्थिक वर्षको चैतमा भन्दा घटेको छ । गत आर्थिक वर्षको चैतमा १५ दशमलव ७४ प्रतिशत निष्क्रिय कर्जा रहेकोमा यो आर्थिक वर्षमा १३ दशमलव १६ प्रतिशत कायम भएको छ । फाइनान्सको वितरणयोग्य मुनाफा २२ करोड ४० लाख ६३ हजार रुपैयाँले ऋणात्मक छ ।