वाणिज्य बैंक सल्लेरीको सेवा सुस्त

सोलुखुम्बु । सोलुखुम्बुको सल्लेरीमा सञ्चालित राष्ट्रिय वाणिज्य बैंकको सेवा सुस्त हुँदा सेवाग्राही हैरान भएका छन् । जिल्ला सदरमुकामबाट सञ्चालन भइरहेको एक मात्र सरकारी बैंकको सेवा प्रवाह सुस्त हुँदा सेवाग्राही घण्टौँ कुरेर सेवा लिन बाध्य छन् ।

सल्लेरीमा झण्डै एक दर्जन बैंकहरु सञ्चालनमा छन् । जसमा निजी बैंकहरुको सेवा राम्रो भए पनि सरकारी बैंकमा ढिलासुस्ती हुनेगरेको सेवाग्राही पेम्बा शेर्पाले गुनासो गरे । जसका कारण अशक्त, अपाङ्गता भएका तथा वृद्धवृद्धाहरु समेत लामो समय लाइनमा उभिन बाध्य भएको सेवाग्राही वीर बहादुर मगरले बताए ।

कर्मचारी विनियमावलीमा वृद्धवृद्धा, अपाङ्गता भएका, सुत्केरी तथा अशक्तहरुलाई सेवाप्रवाहमा पहिलो प्राथमिकता दिइने उल्लेख भए पनि राष्ट्रिय वाणिज्य बैंक सल्लेरीमा त्यस्तो नभएको सेवाग्राहीको गुनासो छ । सल्लेरीकै निजी बैंकको सेवा छिटो छरितो भए पनि सरकारीस्तरको बैंकका कर्मचारीहरुले हेलचेक््रयाइँ गर्दा सेवाग्राही मर्कामा परेको सर्वसाधरण बताउँछन् । सेवाप्रवाहको सवालमा नियमनकारी निकायले अनुगमन नगर्दा समस्या भएको सेवाग्राही महेश राईको गुनासो छ ।

इन्टरनेटको खराबीलगायतका कारण समय–समयमा सेवा प्रभावित हुनेगरेको बैंकका शाखा प्रबन्धक चित्र बहादुर खड्काले बताए । अन्य बैंकहरुको तुलनामा वाणिज्य बैंकमा सेवाग्राहीको भीड बढी हुनेभएकाले लामो समय कुर्नुपरेको उनको भनाइ छ । अशक्त, वृद्धवृद्धाहरुलाई प्राथमिकता दिएर सेवा प्रवाह गर्ने सवालमा आफूहरु प्रतिबद्ध रहेको शाखा प्रबन्धक खड्काले बताए ।