नेपाल रिपब्लिक मिडियाले आईपीओ जारी गर्ने

काठमाडौं । नेपाल रिपब्लिक मिडियाले ४३ करोड ५३ लाख रुपैयाँबराबरको साधारण सेयर जारी गर्ने भएको छ । कम्पनीले हाल कायम रहेको जारी पुँजी ९६ करोड ७५ लाख रुपैयाँमध्येबाट ४४ दशमलव ९९ प्रतिशतले हुनआउने गरी एक सय रुपैयाँ अंकित मूल्यका ४३ लाख ५३ हजार कित्ता साधारण सेयर जारी लागेको हो ।

जारी गरिने कुल साधारण सेयरमध्येमा चार प्रतिशत अर्थात् एक लाख ७४ हजार एक सय २० कित्ता कम्पनीमा कार्यरत कर्मचारीहरूको लागि छुट्याइएको कम्पनीले जनाएको छ । यस्तै पाँच प्रतिशत अर्थात् दुई लाख १७ हजार छ सय ५० कित्ता सामूहिक लगानी कोषको लागि र १० प्रतिशत अर्थात् चार लाख ३५ हजार तीन सय कित्ता वैदेशिक रोजगारीमा रहेका नेपालीहरूलाई छुट्याएको छ । बाँकी रहेको ३५ लाख २५ हजार नौ सय ३० कित्ता सेयर सर्वसाधारणमा बिक्री गरिने कम्पनीले जनाएको छ ।

कम्पनीको सेयर निष्काशन तथा बिक्री प्रबन्धक मेगा क्यापिटल लिमिटेड रहेको छ । खरिदकर्ताहरूले न्यूनतम १० देखि अधिकतम पाँच सय कित्तासम्मको सेयर खरिदको लागि आवेदन दिन सक्नेछन् । साधारण सेयर निष्काशन जेठ २६ गतेदेखि छिटोमा जेठ ३० गते र ढिलोमा असार आठ गतेसम्म बन्द हुनेछ । कम्पनीले वैदशिक रोजगारीमा रहेकाहरूका लागि वैशाख ३१ गतेदेखि जेठ १४ गतेसम्म सेयर निष्काशन गर्ने भएको छ ।