गुराँस लघुवित्तको प्रमुख कार्यकारी अधिकृतमा उपाध्याय नियुक्त

काठमाडौं । गुराँस लघुवित्त वित्तीय संस्थाको प्रमुख कार्यकारी अधिकृतमा विष्णुप्रसाद उपाध्याय नियुक्त भएका छन् । संस्थाको मंगलबार बसेको सञ्चालक समितिको बैठकले आगामी चार वर्षका लागि उपाध्यायलाई कार्यकारीमा नियुक्त गरेको हो ।

सिराहा स्थायी घर भएका उपाध्यायसँग नेपाल इन्स्योरेन्स कम्पनीमा उपप्रबन्धक, प्रबन्धक र वरिष्ठ प्रबन्धक हुँदै प्रमुख कार्यकारी अधिकृतसम्म गरी २१ वर्ष काम गरेको अनुभव छ । त्यस्तै, उपाध्यायले नेपाल पुनर्बीमा कम्पनीमा पुनर्बीमा विज्ञ र कम्पनी सचिवको जिम्मेवारीमा रही चार वर्ष काम गरेका थिए । व्यवस्थापन संकायमा स्नातकोत्तर गरेका उपाध्यायको उच्चस्तरीय नेतृत्व क्षमता र कार्यानुभवले गुराँस लघुवित्तलाई नयाँ उचाइमा लैजान सहयोग गर्ने विश्वास कम्पनीले गरेको छ ।

धनकुटा नगरपालिका वडा नं. ७ मा केन्द्रीय कार्यालय र बुढीगंगा गाउँपालिका वडा नं. १ पुष्पलालचौक विराटनगरमा कर्पोरेट कार्यालय रहेकोे वित्तीय संस्थाले कोशी प्रदेशका १२ वटा जिल्लाहरूमा ३३ वटा शाखा कार्यालयमार्फत् २० हजारभन्दा बढी परिवारलाई लघुवित्त सेवा उपलब्ध गराउँदै आएको संस्थाले जानकारी दिएको छ ।