माछापुच्छ्रे बैंकको आग्रह : मोबाइल बैंकिङ प्रयोगमा सचेत हुनुहोस्

काठमाडौं । माछापुच्छ्रे बैंकले मोबाइल बैंकिङ तथा अन्य डिजिटल सेवाको प्रयोग गर्दा सावधानी अपनाउन ग्राहकहरूलाई आग्रह गरेको छ । बैंकको रौतहटस्थित चन्द्रपुर शाखाका ग्राहकको खाताबाट रकम हराएको सम्बन्धमा विभिन्न सञ्चारमाध्यममा आएका समाचारप्रति गम्भीर ध्यानाकर्षण भएको जनाउँदै बैंकले विज्ञप्ति जारी गरेर यस्तो आग्रह गरेको हो ।

‘ग्राहकको गुनासो प्राप्त भएपछि बैंकले अनुसन्धान गर्दा सम्पूर्ण रकम ग्राहकको मोबाइल बैंकिङ प्रयोग गरी अन्य बैंकका विभिन्न खाताहरू तथा खल्ती वालेटमा ट्रान्सफर गरेको देखिएको छ,’ बैंकले विज्ञप्तिमा भनेको छ ‘बैंकको सिस्टममा कुनै समस्या नदेखिएको र बैंकबाट पठाइएका सम्पूर्ण एसएमएस, एक्टिभेसन कोड तथा ओटीपी ग्राहककै मोबाइलमा गएको देखिएकाले उक्त कोड अनधिकृत व्यक्तिलाई जानकारी नगराई वा ग्राहकको मोबाइलमा अनाधिकृत पहुँच नपु-याई कारोबार हुन नसक्ने देखिन्छ ।’ यस सम्बन्धमा थप अनुसन्धान गरी आवश्यक कारबाही गर्न प्रहरीमा अनुरोधसमेत गरिसकेको जानकारी पनि बैंकले जनाएको छ ।

ग्राहकहरूको बैंक खातामा रहेको बचत पूर्णरूपमा सुरक्षित रहेको जानकारी गराउँदै बैंकले मोबाइल बैंकिङ तथा अन्य डिजिटल सेवाहरूको प्रयोग गर्दा सावधानी अपनाउनसमेत आग्रह गरेको छ । माछापुच्छ्रे बैंक सरल र सुरक्षित तरिकाले ग्राहकलाई सेवा प्रदान गर्न कटिबद्ध रहेको पनि स्पष्ट पारेको बैंकको भनाइ छ ।

क्याटेगोरी : बैंक बित्त बजार
ट्याग : #Page 6