हरित प्रवर्द्धनका लागि प्रभु बैंकलाई ६६ करोड

काठमाडौं । हरित पव्ररद्ध्नका लागि प्रभु बैंकले लक्जेम्बर्गबाट रकम प्राप्त गरेको छ । बैंकका अनुसार लक्जेम्बर्गको एमएसएमई इन्टरप्राइजेज बन्ड एसएबाट ५० लाख डलर अर्थात् नेपाली रुपैयाँ करिब ६६ करोड रुपैयाँ ऋण सुविधा प्राप्त गरेको हो । विश्व वातावरण दिवसका दिन हरित लगानीअन्तर्गत विद्युतीय सवारी साधनहरूमा लगानी गर्न चार वर्ष अवधिका लागि उक्त रकम प्राप्त गरेको बैंकले जनाएको छ । जलवायु परिवर्तनले आक्रान्त विश्व, यसको प्रभावबाट मुक्ति पाउन प्रयासरत रहेको अवस्थामा प्राप्त उक्त रकम सार्वजनिक यातायात र व्यक्तिगत प्रयोजनका लागि प्रयोग हुने र विद्युतीय सवारीसाधनहरू खरिद तथा आयातका लागि सहजरूपमा उपलब्ध गराइने बैंकको भनाइ छ ।

बैंकले वैकल्पिक ऊर्जा तथा एमएसएमई व्यवसाय प्रवर्द्धनका लागि अन्य अन्तर्राष्ट्रिय संस्थाहरूसँग पनि सहकार्यका लागि पहल गरिरहेको र निकट भविष्यमा नै उक्त पहलले सार्थकता पाउने पनि विश्वास लिएको बैंकले जनाएको छ ।