देशैभरिको लकडाउनलाई झन कडा गरिएको दिन राष्ट्रपति विद्यादेवी भण्डारीले जेठ २ मा संघीय संसद्को संयुक्त बैठकमा सरकारको नीति तथा कार्यक्रम प्रस्तुत गरिन् । जानकारहरूका अनुसार यो नीति र कार्यक्रमलाई इतिहासकै सबैभन्दा लामो समय करिब तीन घण्टा लगाएर बाचन भएको थियो । कतिपयले त राष्ट्रपतिकै लागि पनि कष्टदायक भनी आलोचना गरे । उमेरले पाको राष्ट्रपतिलाई यति लामो समयसम्म खडा राखेर सुन्नलाई पनि यो सकसपूर्ण थियो । विपक्षी दलका नेताले त एउटा काव्य नै भनी प्रतिक्रिया दिए ।
अघिल्लो वर्ष २६ पृष्ठको रहेकोे यस्तो कार्यक्रम यो पटक ६३ पृष्ठको रह्यो । देश अघिल्लो वर्षको जस्तो सामान्य अवस्थामा थिएन । यो भाषणभन्दा ठोस कार्यक्रम चाहिने समय थियो । देश कोरोना सङ्कटको अकल्पनीय र असामान्य परिस्थितिबाट गुज्रिएका बेला स्वाभाविक छ, सरकारबाट प्रस्तुत नीति तथा कार्यक्रमलाई प्रतिक्षाका साथ हेरिएको थियो । तर, यसको प्रस्तुति भने विषयवस्तुभन्दा पनि आकारप्रकारले सजिएर आउँदा धेरैलाई खिन्न बनाएको पाइयो ।
स्वावभाविक छ कोरोनाको महामारी फैलिएको बेला र त्यसलाई विस्तार हुन नदिन भनी नागरिकका लागि अत्यन्त कष्ट हुने लकडाउनको घोषणा र त्यस्तो समयको दुई महिना नपुग्दैको समयमा आएको कार्यक्रम कोरोना नियन्त्रणका सन्दर्भमा प्राथमिकतामा पर्ने नै भयो । तर, संसारभरि नै कोरोनाका विरुद्ध र त्यसबाट पीडित नागरिकका लागि जस्तो राहत ल्याइरहेका अवस्था छ त्यसमा यो कार्यक्रमले खासै आशा जगाएको पाइएन । कुरा धेरै छन् । जे पनि गर्ने भनिएको छ । रेल र पानीजहाज पनि प्राथमिकतामै परे ।
कोरोनाको महामारी नियन्त्रण र त्यसले उत्पन्न गरेको संकटको समयमा यस्ता आयोजनाले कसरी गर्लान् भन्ने प्रश्न उब्जियो नै । कतिसम्म भने सत्तारुढ दलका अध्यक्षले नै कार्यान्वयनमा चुनौती हुने भनी प्रतिक्रिया दिए । कार्यान्वयन हुनसकेमा यो पत्रमा उल्लेख भएका कुरा अन्यथा होइनन् । समुद्रमा नेपाली झण्डा फहराएर पानीजहाज चलाउने अभिलाषा प्रत्येक नेपालीको हुन्छ नै । तर, यतिबेलाचाहिँ कोरोनाबाट मुक्ति पाउनु प-यो, यो महामारीले बढी क्षति पु-याउने अवस्थाबाट सरकारले रोक्नुप-यो, जनताको माग यत्ति हो ।
यति लामो नीति र कार्यक्रममा कथङ्काल कोरोना लागिहाल्यो भने सरकारको कुन कार्यक्रमले जोगाउँछ भन्ने आम तहमा विश्वास दिलाउने कुनै दफा छैनन् । निश्चय नै स्वास्थ्य क्षेत्रमा कार्यक्रम बढी छन् । तर, त्यसले आफूलाई राहत पुग्नेछ भन्ने आम जनसमुदायलाई विश्वास दिलाउन सकिएन भने अवस्था जस्ताको तस्तै रहेको बुझनुपर्ने हुन्छ । जस्तो यतिबेला सरकारका विगत दुई महिनाका काम कुरा हावा मात्रै रहेछन् भन्ने प्रकट हुँदै छ । राज्यले व्यवस्था गरेको क्वारेन्टाइनबाट दिनहुँ मानिस भागिरहेका भन्ने समाचार आइरहेका छन् । कतिपय त उपचारकै क्रममा पनि भागेका पाइयो । यदि उनीहरूलाई राखिएको ठाउँ सामान्यरूपले पनि बस्नयोग्य थियो भने यस्तो हुँदैनथियो होला । अहिले आएको नीति र कार्यक्रमले सम्बोधन गर्ने विषय यस्ता थिए तर, आयो रेल र पानीजहाज चलाउने भन्ने कुरा । त्यसैकारण यो कार्यक्रमले सर्वसाधारणमा सरकारप्रतिको भरोसा भर्न सकेन । बजेटबाट सच्याइयोस् ।
क्याटेगोरी : सम्पादकीय
ताजा अपडेट
- तीन अन्तर्राष्ट्रिय विमानस्थल सञ्चालनको सुझाव दिन गठित समितिले किन दियो निजगढ विमानस्थल बनाउने सुझाव
- के शिक्षामन्त्रीले चाहेर मात्रै दलमा आबद्ध शिक्षकहरूलाई बर्खास्त गर्न सम्भव छ?
- इजरेल र इरानसँग कति हतियार छन्, सैन्य शक्ति कसको बढी छ ?
- एमाले राष्ट्रिय महाधिवेशन प्रतिनिधि परिषद् बैठक
- देशभर पश्चिमी वायु र स्थानीय वायुको आंशिक प्रभाव कायमै
- युएई एसिसी प्रिमियर कपको फाइनलमा, नेपाल छ विकेटले पराजित
- प्रत्येक प्रदेशमा एउटा औद्योगिक क्षेत्र बिस्तारको कार्यक्रम ल्याइने : मन्त्री भण्डारी
- पूर्वमुख्यसचिव शाक्यको राजकीय सम्मानका साथ अन्त्येष्टि
धेरैले पढेको
- समसामयिक राजनीतिक व्यङ्ग्य
- राजेन्द्र विमल र हरिहर शर्मालाई पुरस्कृत गरिने
- ढोरपाटन जोड्ने सडक कालोपत्रे गरिँदै
- युनिश शाहीको गीत ‘धारिलो तिर˝ को भ्युज वान मिलियन नाघ्यो
- एक्सेल डेभलपमेन्ट बैंकको ट्राफिक प्रहरीलाई सहयोग
- चिया पसल पनि कम्पनी ?
- इन्फिनिटी लघुवित्तको सातै प्रदेशमा तालिम सम्पन्न
- नेकपा माओवादी केन्द्र कंचनपुर-काठमाडौ सम्पर्क समन्वय समितिको पाचौं भेला सम्पन्न
तपाईको प्रतिक्रिया