पाकिस्तानमा बम विस्फोट, ३९ जनाको मृत्यु

पाकिस्तान । पाकिस्तानको उत्तरपश्चिमी क्षेत्रमा रहेको एक कट्टरपन्थी इस्लामिक पार्टीको राजनीतिक भेलामा आइतबार भएको बम विस्फोटमा परी कम्तीमा ३९ जनाको मृत्यु भएको छ । साथै दर्जनौँ घाइते भएको सरकारी अधिकारीहरूले बताएका छन् ।

खैबर पख्तुनख्वा प्रान्तका स्वास्थ्य मन्त्री रियाज अनवरले एएफपीसँग भने, ‘विस्फोटपछि अस्पतालमा लगिएकामध्ये ३९ जनाको मृत्यु भइसकेको छ भने एक सय २३ जनाको घाइते अवस्थामा उपचार भइरहेको छ ।’ प्रान्तीय गभर्नर हाजी गुलाम अलीले मृतकको संख्याको पछिल्लो विवरणलाई पुष्टि गर्दै सरकारले आक्रमणमा संलग्न व्यक्ति र समूहबारे गहन अनुसन्धान सुरू गरिसकेको बताएका छन् । समाचार तयार पार्दासम्म आक्रमणको कुनै व्यक्ति वा समूहले जिम्मेवारी लिएको छैन ।

अफगानिस्तानसँग सीमा जोडिएको खार सहरमा यसै वर्षको अन्त्यमा हुनलागेको निर्वाचनअघि हुनलागेको जमीयत उलेमा–ए–इस्लाम (एफ) पार्टीको अधिवेशनलाई लक्षित गरी विस्फोट गराइएको अनुमान प्रहरीको प्रारम्भिक अध्ययनबाट देखिएको बताइएको छ ।