ताइवानी कम्पनी फक्सकनले भारतमा लगानी बढाउने

भारत । विद्युतीय सामग्री तथा उपकरण उत्पादनका लागि विश्वभर प्रख्यात रहेको ताइवानी कम्पनी फक्सकनले भारतमा लगानी बढाउने भएको छ । फक्सकनले सूचना प्रविधिको क्षेत्रमा भारतीय बजारमा सम्भावना भएकाले थप लगानी गर्ने बताएको हो ।

फक्सकनका प्रमुख योङ लिउले भारतको तमिलनाडुमा १६ अर्ब रुपैयाँ लागतमा विद्युतीय उपकरण बनाउने कारखाना खोल्ने सहमति गरेको दुई दिनपछि थप लगानी गर्ने बताएका हुन् । फक्सकनले तमिलनाडुमा खोल्न लागेको इलेक्ट्रोनिक कम्पोनेन्ट उत्पादन गर्ने कारखानामा छ हजारभन्दा बढीले रोजगारी पाउने जनाएको छ । तमिलनाडुको चेन्नई नजिक रहेको कन्चिपुर जिल्लामा कारखाना स्थापना हुने भारतीय सरकारी अधिकारीहरुले जनाएका छन् ।

भारतीय प्रधानमन्त्री नरेन्द्र मोदीले गत शुक्रबार गुजरातको गान्धीनगरमा फक्सकनका प्रमुख योङलाई स्वागत गर्दै ‘सेमिकन्डक्टर’ उत्पादन गर्ने कारखाना स्थापना गर्न आग्रह गरेका थिए । प्रधानमन्त्री मोदीले संसारभरका लगानीकर्तालाई भारतमा चिप र सेमिकन्डक्टर बनाउने उद्योग खोल्न आह्वान गर्दै आएका छन् ।