युरोपका तीन देशमाथि व्यापार प्रतिबन्ध लगाउने युक्रेनको तयारी

एजेन्सी । युक्रेनले आफ्नो देशबाट खाद्यान्न निर्यात विवादमा युरोपेली संघ (ईयू)का तीन राष्ट्रले सम्झौता गर्न सहमत नभए उनीहरुमाथि व्यापार प्रतिबन्ध लगाउने संकेत गरेको छ ।

युक्रेनका प्रधानमन्त्री डेनिस इश्मिहालले मंगलबार पोल्याण्ड, हङ्गेरी र स्लोभाकियाले युरोपेली आयोगसँग वार्ता गरेका उपायहरुमा सहमत नभएसम्म व्यापार प्रतिबन्ध लगाउन सक्ने बताएका हुन् । उनले यो बारेमा आफूहरुले विचार गरिरहेको बताएका छन् ।

युक्रेनबाट खाद्यान्न आपूर्तिमा प्रतिबन्ध लगाउने छिमेकी देशहरूको घोषणालाई युक्रेनी अर्थव्यवस्था, ईयूको सिद्धान्त र विश्वव्यापी खाद्य सुरक्षालाई असर पार्ने निर्णयका रूपमा उनले वर्णन गरेका छन् ।

‘यो युरोपेली आयोगको सिफारिसको विपरीत छ र यसले युक्रेनी अर्थव्यवस्था, ईयूको सिद्धान्त र विश्वव्यापी खाद्य सुरक्षाको कानुनलाई उल्लंघन गर्छ’, उनले भने । युक्रेनले आफ्ना छिमेकी देशहरूलाई बजार विकृति रोक्न कृषि उत्पादनका चार समूहको निर्यातका लागि प्रभावकारी नियन्त्रणका उपायहरू लागू गर्ने बताएको छ ।

युरोपेली आयोगले गत साता बुल्गेरिया, रोमानिया, पोल्याण्ड, हङगेरी र स्लोभाकियामा युक्रेनी कृषि उत्पादनमा लगाइएको प्रतिबन्ध नबढाउने निर्णय गरेको बताएको थियो । आयोगको निर्णयको बाबजुद पोल्याण्ड, हङ्गेरी र स्लोभाकियाले प्रतिबन्ध हटाउन अस्वीकार गरेका छन् ।