अमेरिकाले ३० खर्ब अमेरिकी डलरको ऋणपत्र बिक्री गर्दै

वासिड.टन, वैशाख २४
संयुक्त राज्य अमेरिकाले चालू वर्षको दोस्रो त्रैमासिकमा ३० खर्ब अमेरिकी डलर ऋण लिएर कोरोनाभाइरस महामारीबाट अर्थतन्त्र जोगाउने भएको छ । उक्त रकम सन् २००८ को वित्तीय संकटयताकै पाँच गुणा ठूलो ऋण हो । अघिल्लो वर्ष अमेरिकाले १२ खर्ब ८० अर्ब डलर ऋण लिएको थियो । भाइरसले पारेको प्रभाव न्यूनीकरण गरेर राहत प्याकेज, स्वास्थ्य क्षेत्रको कोष खडा तथा प्रत्यक्ष खर्च भुक्तानीका लागि उक्त रकम स्वीकृत भइसकेको बीबीसीले जनाएको छ ।

अमेरिकासँग अब २ सय ५० खर्ब अमेरिकी डलर ऋण पुगेको छ । पछिल्लो खर्च प्याकेज देशको अर्थतन्त्रको १४ प्रतिशत हाराहारीमा हुने जनाइएको छ । यस्तै अमेरिकाले कर तिर्ने समय समेत बढाएको छ । ३० खर्ब डलरबारे पार्टीहरुले छलफल समेत गरिरहेका छन् । अमेरिकाले सरकारी ऋणपत्र बिक्री गरेर रकम लिने गर्छ । अमेरिकी ऋण कम जोखिमयुक्त भएकाले विगतमा पनि न्यून ब्याजदर रहँदै आएको छ । अमेरिकी संसद्को बजेट अफिसले गत महिना यो वर्ष ३७ खर्ब अमेरिकी डलर बजेट घाटा पुग्ने अनुमान गरेको थियो । अमेरिकी केन्द्रीय बैंक फेडेरल रिजर्भले गत हप्ताहरुमा १० खर्ब डलरको ट्रेजरी खरिद गरेको थियो ।