अमेरिकामा दुई लाख ४५ हजार नयाँ रोजगारी थप

वासिङटन ।
कोरोना भाइरसका कारण अमेरिकी अर्थतन्त्रमा परिरहेको प्रभावका कारण अमेरिकी रोजगारी दरमा अपेक्षाकृत सुधार आउन नसकेको यहाँको श्रम मन्त्रालयले शुक्रबार जनाएको छ । विश्लेषकहरूले अपेक्षा गरेभन्दा श्रम बजार सुधार दर सुस्त देखिएको तर यसलाई महामारी नियन्त्रणमा आएसँगै सहजै सुधार गर्न सकिने प्रशस्त आधारहरू रहेका जनाएका छन् ।

नोभेम्बरमा बेरोजगारी दर अघिल्लो महिनाभन्दा करिब ०.२ प्रतिशतले कमी आएको हो । अक्टोभरमा ६.९ प्रतिशत कायम भएको बेरोजगारी दर नोभेम्बरमा घटेर ६.७ पुगेको अमेरिकी श्रम बजार विश्लेषकहरूले बताएका छन् । महामारीको प्रभावसँगै ठूलो संख्या अर्थात् एक करोड ७० लाख श्रमिकले बेरोजगार बनेका थिए । अमेरिकामा नोभेम्बरमा लामो समय अर्थात् २७ हप्ताभन्दा बढी बेरोजगार हुनेको संख्यामा तीन लाख ८५ हजारले वृद्धि भई कुल ३९ लाखभन्दा बढी पुगेको मन्त्रालयले जनाएको छ । (आर्थिक दैनिकबाट)