मस्क फेरि पछि परे

अमेरिका ।
अमेरिका, फागुन १२ । टेस्लाका मालिक एलन मस्कले विश्वकै धनीको उपमा गुमाएका छन् । टेस्लाको सेयर मूल्य ह्वात्तै घटेपछि मस्क विश्वकै ठूलो धनीबाट एक तह तल झरेका हुन् । जनवरीको सुरुतिर आठ सय ८० अमेरिकी डलर प्रतिकित्ताभन्दा धेरै पुगेको टेस्लाको सेयर मूल्य अहिले फेरि २० प्रतिशतभन्दा धेरैले ओरालो लागेको छ । खासगरी यो हप्ता कम्पनीको सेयर मूल्यमा गिरावट आएको हो ।

बीबीसीका अनुसार टेस्लाले जोखिमपूर्ण मानिएको बिटक्वाइनमा डेढ अर्ब अमेरिकी डलर लगानी गरेको समाचारले टेस्लाको सेयरमा प्रभाव परेको हो । योसँगै उनको स्थान फेरि अमेजनका मालिक जेफ बेजोसले लिएका छन् । बिटक्वाइनसँग सम्बन्धित हुनखोज्दा टेस्लाका कतिपय लगानीकर्ताले सेयर बेचेको बताइएको छ ।

मस्कले बिटक्वाइन खरिद गर्दा त्यसको सकारात्मक असर भने बिटक्वाइनलाई नै परेको थियो । जसले गर्दा बिटक्वाइन ५० प्रतिशतले महंगिएको छ । आइतबार ५७ हजार अमेरिकी डलर प्रति एक मूल्य पुगेको बिटक्वाइन फेरि २० प्रतिशतले घटेको छ । मंगलबार बिटक्वाइन ४८ हजार डलर प्रति एक मूल्य कायम भएको छ ।