युरोपमा बेलायती निर्यात ४० प्रतिशत घट्यो

लन्डन ।
बेलायतमा उत्पादन तथा निर्माण भएका वस्तुहरुको युरोपकै अन्य देशमा निर्यात ह्वात्तै घटेको छ । बेलायती अफिस फर नेशनल स्टाटिस्टिक्स (ओएनएस)का अनुसार जनवरी महिनामा ४० प्रतिशतले निर्यात घटेको हो । त्यस्तै आयातमा पनि २८.८ प्रतिशत कमी आएको बीबीसीले जनाएको छ । सन् १९९७ देखि तथ्यांक राख्न सुरु गरिएयताकै यो अहिलेसम्मकै ठूलो गिरावट भएको बताइएको छ । बेलायत र युरोपेली संघबीच नयाँ व्यापारसम्बन्धी नियम कार्यान्वयनमा आएयता यस्तो गिरावट आएको बताइएको छ । धेरैजसो गिरावटमा भने अस्थायी तत्वहरुको कारण यसो हुन गएको ओएनएसले जनाएको छ ।

नयाँ तथ्यांकअनुसार बेलायतको अर्थतन्त्र समेत २.९ प्रतिशतले खुम्चिएको छ । कोरोना रोक्न तेस्रो लकडाउन जारी रहेका बेला यस्तो तथ्यांक सार्वजनिक भएको हो । यस्तै कोरोना महामारी सुरु हुनुअघिभन्दा बेलायतको अहिलेको अर्थतन्त्रको आकार नौ प्रतिशतले सानो भएको छ । जनवरीमा बेलायतबाट निर्यात घटेर साढे पाँच अर्ब पाउन्ड स्टर्लिङमा झरेको छ । त्यस्तै आयात पनि घटेर साढे अर्ब पाउन्डमा झरेको छ ।

ओएनएसका अनुसार युरोपबाट ठूलो परिमाणमा मेसिनरी र यातायात सामग्री आयात भएको छ । त्यस्तै युरोपबाट केमिकल पनि धेरै परिमाणमा आयात भएको छ । त्यस्तै कार, औषधि र यससम्बन्धी उत्पादन आयातमा भने प्रभाव परेको छ । यसरी व्यापार घट्नुमा मुख्य भूमिका ब्रेक्जिटले गरेको देखिएको छ । तर बेलायतको गैरयुरोपेली मुलुकसँगको व्यापार भने जनवरी महिनामा १.७ प्रतिशतले बढेको छ ।