Techie IT
×
गृहपृष्ठअन्तर्राष्ट्रियविदेशमा भारतीय कम्पनीले एकै महिनामा गरे झण्डै दुई अर्ब डलर लगानी

विदेशमा भारतीय कम्पनीले एकै महिनामा गरे झण्डै दुई अर्ब डलर लगानी


नयाँ दिल्ली ।
भारतीय कम्पनीहरुले एकै महिनामा विदेशमा झण्डै दुई अर्ब अमेरिकी डलर लगानी गरेका छन् । भारतीय मिडियाका अनुसार कम्पनीहरुले मार्च महिनामा एक अर्ब ९३ करोड अमेरिकी डलर प्रत्यक्ष वैदेशिक लगानी गरेका हुन् । यो पछिल्लो वर्षको सोही महिनाभन्दा आधा मात्रै हो ।

भारतीय रिजर्व बैंकको तथ्यांकअनुसार सन् २०२० मा दोस्रो देशमा तीन अर्ब ८६ करोड डलर लगानी गरेका थिए । यो वर्ष फेब्रुअरीमा पनि बाहिर गरिएको लगानी एक अर्ब ९५ करोड डलर थियो । भारतीय लगानीकर्ताले विदेशमा रहेका आफ्ना व्यावसायिक इकाइहरुमा यो वर्ष मार्चमा भएको कुल लगानीमध्ये एक अर्ब १५ करोड डलरको ग्यारेन्टी गरेको रकम छ । बाँकी ४१ करोड ३२ लाख डलर ऋणका रुपमा र ३६ करोड ३५ लाख डलर इक्विटी अर्थात् स्वपुँजीका रुपमा रहेको बताइएको छ । धेरै लगानी गर्नेमा भने भारतीय दूरसञ्चार कम्पनी भारती एयरटेल लिमिटेड, औषधि कम्पनी ल्युपिन लिमिटेड र एसआरएफ लिमिटेड छन् ।

भारती एयरटेलले मौरिससमा रहेको आफ्नो कम्पनीको इकाइमा ७५ करोड डलर लगानी गरेको छ भने ल्युपिनले अमेरिकामा रहेको व्यवसायमा २५ करोड डलर लगानी गरेको छ । त्यस्तै एसआरएफ लिमिटेडले नेदरल्यान्डस्थिगत पूर्ण सहायक इकाइमा आठ करोड ३८ लाख डलर लगानी गरेको छ । यसबाहेक महिन्द्रा एण्ड महिन्द्राले मौरिससमा रहेको सब्सिडरी इकाइमा आठ करोड ४५ लाख डलर लगानी गरेको छ । यस्तै इन्डियन होटल्स कम्पनी लिमिटेडले नेदरल्यान्डमा आफ्ना सब्सिडरी इकाइमा पाँच करोड ९५ लाख डलर लगानी गरेको छ ।


क्याटेगोरी : अन्तर्राष्ट्रिय

तपाईको प्रतिक्रिया