Techie IT
×
गृहपृष्ठअन्तर्राष्ट्रियगुगल, अमेजन, फेसबुक, इबेलगायतका साढे दुई करोड व्यक्तिगत सूचना चोरिएको खुलासा

गुगल, अमेजन, फेसबुक, इबेलगायतका साढे दुई करोड व्यक्तिगत सूचना चोरिएको खुलासा


अमेरिका ।
प्रयोगकर्ताका व्यक्तिगत विवरण गुगल, अमेजन, फेसबुक र इबेजस्ता इन्टरनेट कम्पनीबाट चोरी भएको खुलासा भएको छ । फक्स बिजनेसका अनुसार दुई वर्षको अवधिमा मालवेयरले ३२ लाख विन्डोजमा आधारित कम्प्युटरबाट दुई करोड ६० लाख हाराहारीमा लगइन विवरण चुहावट भएको खुलेको हो ।

साइबर सुरक्षासम्बन्धी नर्डलकरको प्रतिवेदनअनुसार ट्रोजन टाइप मालवेयरले सन् २०१८ देखि २०२० सम्म ती कम्प्युटरबाट १.२ टेराबाइट व्यक्तिगत विवरण चोरेको पाइएको छ । चुहावट भएका सूचनामा प्रयोगकर्ताका इमेल, युजरनेम र पासवर्डलगायत छन् । ती सबै दश लाख वेबसाइटबाट प्राप्त भएका छन् । नर्डलकरले डेटा चुहावटबारे अनुसन्धान गरी प्रतिवेदन तयार गरेको हो ।

लक्षित गरिएका वेबसाइटमा अमेजन, वालमार्ट, इबे, फेसबुक, ट्विटर, एप्पल, ड्रपबक्स र लिंक्डइन लगायत छन् । उक्त मालवेयर इमेल र अवैध सफ्टवेयरबाट सारिएको थियो । त्यसमध्ये एडोब फोटोशप २०१८को पाइरेट भर्सन पनि एक भएको बताइएको छ । यो एउटा विन्डोजको क्र्याकिङ टुल हो । यसरी व्यक्तिगत सूचना चोर्न मालवेयरले व्यक्तिको सूचनाको स्क्रिनशट लिन सफल भएको थियो । त्यसबाहेक वेब क्यामरा भएका कम्प्युटरबाट प्रयोगकर्ताको फोटो समेत लिन सफल भएको बताइएको छ ।

चोरिएका डेटाबेसमध्ये दुई अर्ब ब्राउजर कुकिज र ६६ लाख फाइल समावेश रहेको बताइएको छ । त्यसमध्ये १० लाख फोटो र अरु छ लाख ५० हजार वर्ड तथा पीडीएफ फाइलहरु समावेश छन् । कुकिजले ह्याकरलाई उनीहरुको लक्ष्य गरिएका वर्गको बानी र चाहनाको वास्तविक तस्बिर बनाउन सहयोग गर्ने उक्त रिपोर्टमा भनिएको छ । केही केही केसमा त कुकिजले व्यक्तिको अनलाइन एकाउन्टसम्मै पहुँचमा सहयोग पु-याउँछ ।


क्याटेगोरी : अन्तर्राष्ट्रिय

तपाईको प्रतिक्रिया