भर्चुअल मुद्रालाई सहयोग पुग्ने कुनै पनि कारोबार नगर्न बैंकहरुलाई चीनको निर्देशन

बेइजिङ ।
चीनको केन्द्रीय बैंकले सबै बैंकहरुलाई डिजिटल (भर्चुअल) मुद्रासँग सम्बन्धित कुनै पनि कारोबार रोक्न निर्देशन दिएको छ ।

यसअघि नै क्रिप्टोकरेन्सीमाथि कडाइ गरेको चीनले बैंकहरुलाई यस्ता कारोबारलाई सहयोग नगर्न भनेको बीबीसीले जनाएको छ । योसँगै चिनियाँ बैंक र भुक्तानी सेवाप्रदायक बिटक्वाइनलगायतका भर्चुअल मुद्रासँग सम्बन्धित गतिविधिबाट वञ्चित भएका छन् ।

चीनले सिचुवान प्रान्तमा बिटक्वाइन माइनिङ अपरेसन समेत बन्द गर्न गत शुक्रबार निर्देशन दिएको थियो । यो समाचारसँगै सोमबार बिटक्वाइनको मूल्य १० प्रतिशतभन्दा धेरैले घटेको थियो । तर मंगलबार भने एसियन ट्रेडिङमा केही सुधार भएको बताइएको छ ।

अप्रिलमा ६३ हजार अमेरिकी डलर प्रतिबिटक्वाइन मूल्य पुगेपछि ओरालो लाग्ने क्रममा हालसम्म ५० प्रतिशतले यसको मूल्य गिरावट भएको छ ।

सोमबार चिनियाँ केन्द्रीय बैंक (पिपल्स बैंक अफ चाइना) ले भर्खरै धेरै मुख्य बैंक र भुक्तानी सेवाप्रदायकलाई क्रिप्टोकरेन्सी ट्रेडिङमा कडा कदम चाल्न सचेत गराएको जनाएको छ ।केन्द्रीय बैंकले यसबाट ट्रेडिङका रुपमा वस्तु वा सेवाको कारोबार नगर्न भनेको छ ।