Techie IT
×
गृहपृष्ठअन्तर्राष्ट्रिय१७ अर्ब डलर लागतको चिप प्लान्ट बनाउन सामसङले रोज्यो टेक्सस

१७ अर्ब डलर लागतको चिप प्लान्ट बनाउन सामसङले रोज्यो टेक्सस


अमेरिका । प्रविधि कम्पनी सामसङले अर्बौँ डलरको चिप प्लान्ट बनाउन अमेरिकी राज्य टेक्सस रोजेको छ । कम्पनीले टेक्ससस्थित टेलर सहरमा आफ्नो नयाँ १७ अर्ब डलर लागतको कम्प्युटर चिप प्लान्ट बनाउने भएको बीबीसीले जनाएको छ ।

अहिले विश्वमा सेमिकन्डक्टर चिपको चरम अभाव चलिरहेको छ । यसलाई दक्षिण कोरियाली इलेक्ट्रोनिक कम्पनीको अमेरिकामा अहिलेसम्मकै ठूलो लगानी मानिएको छ । यो प्लान्टले दुई हजार रोजगारी सुनिश्चित गर्नेछ । अर्को वर्षदेखि प्लान्ट निर्माण सुरु हुने बताइएको छ । चिपको आपूर्तिमा समस्या आइरहँदा अरु प्रतिस्पर्धी कम्पनीसँगै सामसङले पनि अमेरिकामा चिप उत्पादनलाई विस्तार गरिरहेको छ ।

‘ठूलो उत्पादन क्षमतासँगै हामी ग्राहकको माग पूरा गर्न र विश्व सेमिकन्डक्टर आपूर्ति शृंखलामा योगदान गर्न सक्षम हुनेछौँ’, कम्पनीको इलेक्ट्रोनिक डिभाइस सलुसनका प्रमुख कार्यकारी किनाम किमले भने । यो प्लान्ट सन् २०२४ को आधाआधीतिर सञ्चालनमा आउने आश गरिएको छ । अमेरिकी राष्ट्रपति जो बाइडेनले चिप उत्पादकहरुलाई उत्पादनको रफ्तार बढाउन आग्रह गरिरहेका बेला सामसङको योजना कार्यान्वयन हुनलागेको हो । ह्वाइटहाउसका अधिकारीहरुले नयाँ प्लान्टले आपूर्ति शृंखलालाई जोगाउन सघाउ पुग्ने, उत्पादन आधारलाई बलियो बनाउने र रोजगारी सिर्जनामा मद्दत दिने बताएका छन् ।

‘हाम्रो राष्ट्रिय र आर्थिक सुरक्षाका लागि सेमिकन्डक्टर चिपको घरेलु उत्पादन बढाउनु निकै महत्वपूर्ण छ’, अमेरिकी वाणिज्य मन्त्री जिना राइमोन्दोले भनिन् । टेक्ससका रिपब्लिकन गभर्नर ग्रेग एबटले ट्विट गर्दै सामसङलाई टेक्ससले स्वागत गर्ने बताए । उनले सामसङको योजनाबारे पनि उल्लेख गरेका छन् । जसअनुसार सामसङले टेक्ससको टेलरमा प्लान्ट बनाउनेछ । यसमा १७ अर्ब अमेरिकी डलर पुँजी लगानी रहँदा हजारौँले रोजगारी पाउने उनले उल्लेख गरेका छन् । एबटका अनुसार टेक्ससमा यो नै अहिलेसम्मकै ठूलो प्रत्यक्ष वैदेशिक लगानी भित्रिएको हो ।

एक फरक वक्तव्यमा टेक्ससको गभर्नरको कार्यालयले सामसङलाई दुई करोड ७० लाख अमेरिकी डलर राज्यमा रोजगारी सिर्जनाका लागि अनुदानस्वरुप उपलब्ध गराउने बताएको छ । उक्त प्लान्टमा बन्ने चिप प्रविधिको दायराअनुसार मोबाइल, फाइभजी, उच्च प्रस्तुति दिने कम्प्युटिङ र आर्टिफिसियल इन्टेलिजेन्सअनुसारको हुनेछ । सामसङ विश्वका ठूला चिप उत्पादकमध्ये एक हो । अमेरिकामा यसका २० हजार कर्मचारी छन् । सामसङले पछिल्लो घोषणासँगै कम्पनीको कुल लगानी अमेरिकामा ४७ अर्ब डलर पुग्ने जनाएको छ ।

विश्वभर चिप अभाव गहिरिँदा उत्पादकहरुलाई समस्या परिरहेको छ भने कार उत्पादक कम्पनीहरुले कति उत्पादन गृह बन्द नै गर्नुपरेको छ । सँगसँगै ताइवानी चिप उत्पादक टीएसएमसीले पनि अमेरिकाको एरिजोना राज्यमा एक खर्ब डलर लगानी गर्ने घोषणा एक वर्षअघि नै गरेको थियो । त्यस्तै अर्को कम्पनी ग्लोबलफाउन्डरले पनि न्युयोर्कमा आफ्नो लगानी वृद्धि गर्ने बताएको थियो ।


क्याटेगोरी : अन्तर्राष्ट्रिय

तपाईको प्रतिक्रिया