Techie IT
×
गृहपृष्ठअन्तर्राष्ट्रियहेलिकोप्टर दुर्घटनामा भारतीय रक्षाप्रमुख रावत दम्पतीसहित १३ जनाको मृत्यु

हेलिकोप्टर दुर्घटनामा भारतीय रक्षाप्रमुख रावत दम्पतीसहित १३ जनाको मृत्यु


नयाँ दिल्ली । तमिलनाडुमा भएको सैनिक हेलिकप्टर दुर्घटनामा भारतीय रक्षा प्रमुख अर्थात् चिफ अफ डिफेन्स स्टाफ (सीडीएस) बिपिन रावत र उनकी पत्नीसहित १३ जनाको मृत्यु भएको छ ।

उच्च सैन्य अधिकारी बोकेको भारतीय वायुसेनाको दुर्घटनाग्रस्त सैन्य हेलिकोप्टरमा यात्रारत १४ जनामध्ये तेह्र जनाको मृत्यु भएको पुष्टि भएको छ ।
बुधबार तमिलनाडुको निलगिरि पहाडी जिल्लाको कूनर नजिकै दुर्घटना भएको थियो । हेलिकप्टरमा सीडीएस रावत, उनकी श्रीमती र अन्य सैनिक कर्मचारी थिए । भारत सरकारले बिहीबार संसदलाई यसबारे जानकारी गराउने बताइएको छ ।

विमान कोयम्बटोरस्थित सुलुर आईएएफ सैन्य सिविरबाट वेलिङ्गटनस्थित ‘डिफेन्स स्टाफ कलेज’तर्फ जाँदै थियो । भारतीय प्रधानमन्त्री मोदीले घटनाबारे प्रतिक्रिया दिँदै ट्वीटमा सैनिक हेलिकोप्टर दुर्घटनाले आफूलाई स्तब्ध बनाएको उल्लेख गरेका छन् ।

हेलिकोप्टर दुर्घटना भएको ठाउँबाट निकालिएका शवहरु सैनिक अस्पताल वेलिङ्गटन लगिएको थियो । यसअघि तमिलनाडुका मुख्यमन्त्री एमके स्टालिनले घटनाप्रति दुःख व्यक्त गर्दै उद्धार कार्यमा आवश्यक सबै सहयोग उपलब्ध गराउन स्थानीय प्रशासनलाई निर्देशन दिएको बताएका थिए ।

भारतीय वायु सेनाका अनुसार दुर्घटनामा सीडीएस जनरल रावत र उनकी पत्नी मधुरिका रावत, ब्रिगेडियर एलएस लिडर, लेफ्टिनेन्ट कर्नल हरजिन्दर सिंह, एनके गुरसेवक सिंह, एनके जितेन्द्र कुमार, एल/एनके विवेक कुमार, एल/एनके बी साई तेजा र हाव सत्पाललगायत विमानमा सवार थिए । आईएएफले दुर्घटनाको छानबिन गर्न निर्देशन दिएको छ । दुर्घटनामा एक जना पाइलट मात्र बाँचेको भारतीय मिडियाले उल्लेख गरेका छन् । यसअघि रावत भारतीय स्थल सेनाध्यक्ष थिए । 


क्याटेगोरी : अन्तर्राष्ट्रिय

तपाईको प्रतिक्रिया