Techie IT
×
गृहपृष्ठअन्तर्राष्ट्रिय२०२१ मा बिके ८ सय ८७ विलासी पानीजहाज

२०२१ मा बिके ८ सय ८७ विलासी पानीजहाज


अमेरिका । कसिलो आपूर्ति शृंखलाका बीच गत वर्ष सुपरयाटको बिक्री उच्च विन्दुमा पुगेको छ । सन् २०२१ मा ८८७ सुपरयाटहरु बिक्री भएका थिए । जुन अघिल्लो वर्षभन्दा ७७ प्रतिशतले बढी र सन् २०१९ को तुलनामा दोब्बरले बढी भएको भेसेल्सभ्यालुको एक रिपोर्टले देखाएको छ । यसकै बीच ब्लुमबर्ग अर्बपति सूचकांकअनुसार एक खर्ब ७४ अर्ब ७० करोड अमेरिकी डलर सम्पत्ति भएका जेफ बेजोस आफ्नो ४१७ फुट लामो सुपरयाटको डेलिभरी कुरिरहेका छन् ।

ब्लुमबर्गका अनुसार यसको निर्माण अन्तिम चरणमा प्रवेश गरेको छ । यो नेदरल्यान्डमा बनिरहेको छ । उनीमात्र होइनन्, सुपरयाटको व्यग्र प्रतीक्षामा स्टिभन स्पाइलबर्ग पनि छन् । उनले पनि १५ करोड ८० लाख अमेरिकी डलर मूल्यको पुरानो याटपछि अर्को अर्डर गरेका छन् । पुरानो याट गत नोभेम्बरमा बिक्री भए पनि मूल्यबारे उल्लेख गरिएको छैन ।

गत वर्ष विश्वका ५०० धनीका लागि कम ब्याजदर र बुलिस सेयरबजारले १० खर्ब डलर सम्पत्ति थपिदियो । भेसेल्सभ्यालुका अनुसार कोरोना महामारी र बढ्दो सम्पत्ति आर्जनले सुपरयाटको माग ह्वात्तै बढाइदियो । यसमा सस्तो दरमा ऋण पाउने सुविधाले थप मलजल गर्यो ।

यसैबीच, ब्याजदर बढ्दै गर्दा र इक्विटी मार्केटमा ससाना छाल आउँदै गर्दा नवप्रवर्तनको अभावका कारण आगामी केही महिनासम्म कम्तीमा सुपरयाटको मूल्य घटाउनेछैन । सुपरयाट बनाइसक्न धेरै वर्षको समय लाग्छ । त्यही भएर यसलाई खरिद गर्ने धेरै सेकेन्डह्यान्ड सुपरयाटमा रुचि राख्छन् ।

‘किन्नका लागि पर्याप्त याटहरु उपलब्ध छैनन्’, भेसेल्सभ्यालुमा सुपरयाट प्रमुख साम टकर भन्छन् । आपूर्ति शृंखलामा अवरोध र मजदुर अभावले अवस्था झनै नाजुक बनाइदिएको छ । त्यसमा शिपयार्ड पनि निकै सीमित छन् र नयाँ बन्न निकै लामो समय लाग्छन् । सोही कारण अहिले जो जोसँग छ, उच्च मूल्यका छन् ।
त्यसो त सुपरयाटमा खासै लगानी गरिँदैन । यसको अवमूल्यन कम र वार्षिक सञ्चालन खर्च उच्च छ । अर्थात् झण्डै कुल मूल्यको १० प्रतिशतजति । तर खँदिलो बजारको अर्थ यसको मूल्य सन् २०२१ मा मात्रै ५ देखि ८ प्रतिशतसम्म बढेको छ ।

‘याटका मालिकका लागि यो त महत्वपूर्ण समय हो’, टकर भन्छन्, ‘एक वर्षअघि जजसले यो किने उनीहरु सम्भवतः १ वर्ष निःशुल्क आनन्द लिएर अहिले नाफाका लागि बिक्री गर्न चाहेका हुनसक्छन् ।’ ब्लुमबर्गबाट 


क्याटेगोरी : अन्तर्राष्ट्रिय

तपाईको प्रतिक्रिया