बंगलादेशमा बन्यो सामसुङ ग्यालेक्सी नोट १० प्लस

ढाका, माघ २४
दक्षिण कोरियाली प्रविधि कम्पनी सामसुङले आफ्नो स्मार्ट डिभाइस ग्यालेक्सी नोट १० प्लस बंगलादेशस्थित आफ्नो प्लान्टमा निर्माण गरेको छ । बंगलादेशी मिडियाहरुका अनुसार कम्पनीले एसेम्बलिङ उद्योगबाट उक्त मोडलको फोन उत्पादन गरेको हो । नोट १० प्लसमा कम्प्युटरजस्तै डिजाइन गरिएको छ भने गेम खेल्न, मुभी टेक क्यामरा र इन्टेलिजेन्ट पेनजस्ता फिचर छन् ।

सामसुङको स्थानीय असेम्बली पार्टनर फेयर इलेक्ट्रोनिक्सका मार्केटिङ अफिसर मोहम्मद मेस्बाह उद्दिनले बंगलादेशमा उत्पादन भएको उत्कृष्ट ह्यान्डसेट रहेको बताए । बंगलादेशको नार्सिंग्दीमा रहेको फेयर इलेक्ट्रोनिक्सको ५८ हजार वर्गफिट प्लान्टबाट नोट १० प्लस उत्पादन गरिएको हो । उक्त उत्पादनसँगै नोट १० प्लस ३१ हजार ३ सय टाका सस्तोमा पाइनेछ । अहिले उक्त फोन १ लाख १३ हजार टाकामा बिक्री भइरहेको बताइएको छ ।

सुरुमा १ हजार ५ सय युनिट फोन उत्पादन भएको बताइएको छ । ती सबै बिक्री भइसकेका छन् । बजारबाट समेत फोनको राम्रो प्रतिक्रिया आएको बताइएको छ । गत वर्षदेखि सामसुङको ह्यान्डसेट एसेम्बल गर्न सुरु गरिएको थियो । हालसम्म कम्पनीका २५ मोडलका फोन उक्त प्लान्टबाट एसेम्बल भइसकेको छ ।