Techie IT
×
गृहपृष्ठअन्तर्राष्ट्रियबंगलादेशका विद्यालयहरू पुनः सञ्चालन गर्ने तयारी

बंगलादेशका विद्यालयहरू पुनः सञ्चालन गर्ने तयारी


ढाका । बंगलादेशका विद्यालयहरू पुनः सञ्चालन गर्ने तयारी भएको छ । प्रधानमन्त्री शेख हसिनाले कोरोनाभाइरसको महामारी कम हुँदै गएकाले विद्यालयहरू सञ्चालन गर्ने तयारी भइरहेको जानकारी दिएकी हुन् ।

उनका अनुसार यही फेब्रुअरीको अन्त्यदेखि देशभरका सबै शैक्षिक संस्थाहरू सञ्चालन गर्ने तयारी भएको हो । भौतिक रूपमा उपस्थित भएर अध्ययन गर्न नपाउँदा विद्यार्थीहरूले दिक्क मानेको, साथी तथा शिक्षकशिक्षिकालाई भेट्न खोजेको, कक्षाकोठा तथा विद्यालयमा रमाउन चाहेको पनि उनले बताइन् ।

प्रधानमन्त्री हसिनाले देशभर खोप लगाएका विद्यार्थीहरूको संख्या, विद्यालयहरूको अवस्था, विद्यालय सञ्चालन गर्ने तरिकालगायतका विषयमा अध्ययन र छलफल भइरहेको जानकारी दिइन् ।

‘अब अवस्था परिवर्तन र सुधार भएको छ भन्ने हामीलाई लागेको छ, त्यसैले अब विद्यालयहरू सञ्चालन गर्ने तयारी भइरहेको छ’, उनले भनिन् । बंगलादेश सरकारले पछिल्लो पटक यही फेब्रुअरी ३ देखि २० सम्मका लागि विद्यालय बन्द गर्ने समयावधि थप गरेको छ । पछिल्लो पटक थपिएको समयावधि सकिन एक हप्ता बाँकी हुँदा प्रधानमन्त्री हसिनाले अब भने म्याद नथप्ने संकेत गरेकी हुन् ।

कोरोनाभाइरसको महामारीका कारण सन् २०२० को मार्चदेखि अहिलेसम्म बंगलादेशमा १९ लाख नौ हजार छ सय ६४ जना संक्रमित भएका छन् । पछिल्लो समय दैनिक औसतमा चार हजार नयाँ संक्रमित थपिने गरेका छन् । त्यसैगरी कोरोनाका कारण कुल २८ हजार आठ सय १९ जनाको मृत्यु भएको पनि बंगलादेशको स्वास्थ्य मन्त्रालयका अधिकारीहरूले जानकारी दिएका छन् । रासस/सिन्ह्वा


क्याटेगोरी : अन्तर्राष्ट्रिय

तपाईको प्रतिक्रिया