रुसले युक्रेनमाथि आक्रमण गरे गहुँ र मकैको मूल्य बढ्ने

ब्रसेल्स । पछिल्ला केही दिनयता रुस–युक्रेन तनाव बढेको छ । अमेरिकाले सार्वजनिक रुपमै यही सातासम्म युक्रेनमाथि रुसले आक्रमण गर्ने दाबी गर्दै आएको छ । यदि बाहिर आएका समाचार सत्य भए त्यसको प्रभाव कृषिजन्य उत्पादनमा पर्ने देखिएको छ ।

खासगरी युक्रेनमाथिको रुसी आक्रमणले गहुँ र मकैको मूल्य आकाशिने देखिएको हो । रुस विश्वमा धेरै गहुँ निर्यात गर्ने देश हो । यता युक्रेनले पनि गहुँ र मकैको ठूलै निर्यात गर्दै आएको छ । आक्रमण भएको तनावपूर्ण अवस्थामा यी कृषिवस्तुको मूल्य बढ्नेछ । यसले खाद्य क्षेत्रमा महंगी झन् बढ्नसक्ने अपेक्षा गरिएको छ ।

सन् २०२१ मै विश्व खाद्य मूल्य २८ प्रतिशतले बढेको राष्ट्रसंघीय खाद्य तथा कृषि संगठनले जनाएको छ । यो वर्ष पनि आपूर्तिगत समस्याले मूल्यवृद्धिमा निरन्तरता हुने उसको आकलन छ । दुई प्रमुख निर्यातकबीचको तनावले आपूर्ति शृंखलामा पनि ठूलै समस्या हुनेछ । त्यसपछि पश्चिमा राष्ट्रले रुसमाथि लगाउने प्रतिबन्धले पनि यसमा मलजल गर्नसक्ने आकलन छ ।