युक्रेन तनाव कम हुँदा बढे एसियाली सेयर

टोक्यो । बुधबार एसियाली सेयर सूचकहरु बढेका छन् । खासगरी रुस–युृक्रेन सम्भावित युद्धबारे सकारात्मक समाचार आएसँगै सेयरबजार केही आशावादी बनेको एपीले जनाएको छ ।

यद्यपि विश्लेषकहरुले भने उक्त तनाव अहिले नै नटरिसकेको बताएका छन् । जापानको बेन्चमार्क निकी २२५ २.१ प्रतिशतले बढेको थियो भने अस्ट्रेलियाको एसएन्डपी/एएसएक्स २०० पनि शून्य दशमलव छ प्रतिशतले उकालो लागेको थियो । त्यसैगरी दक्षिण कोरियाको कोस्पी १.७ प्रतिशतले बढेको थियो । यता हङकङको हाङसेङ १.४ प्रतिशतले बढ्दा शांघाई कम्पोजिट शून्य दशमलव छ प्रतिशतले बढेको थियो ।

यता वालस्ट्रिटमा प्रविधि कम्पनीहरुको सेयर पनि बढेको छ । रुसले युक्रेनी सीमानजिकै तैनाथ गरेका सेनाहरु फिर्ता बोलाउनथालेपछि केही आशाका किरण देखिएका हुन् । अमेरिकी सेयरबजार एसएन्डपी ५०० १.६ प्रतिशतले र डो जोन्स इन्डस्ट्रियल एभरेज पनि १.२ प्रतिशतले बढेको थियो । प्रविधि कम्पनीको बाहुल्य रहेको नास्डाक २.५ प्रतिशतले बढेको एपीले जनाएको छ ।

रुसी राष्ट्रपति भ्लादिमिर पुटिनले समेत अमेरिका र उत्तर एटलान्टिक सैन्य गठबन्धन नाटोसँग छलफल गर्ने बताएका थिए । अमेरिकाले भने अझै पनि रुसले सेना फिर्ता गरेको नगरेको बारेमा सुनिश्चित हुन बाँकी रहेको बताएका छन् ।

क्याटेगोरी : अन्तर्राष्ट्रिय