फोर्डको व्यवस्थापन हेरफेर, जिम फेर्ले बने सीओओ

डेट्रोयट, फागुन २
फोर्ड मोटर कम्पनीले शुक्रबार व्यवस्थापन हेरफेर गरेको छ । कम्पनीले रणनीति प्रमुख जिम फेर्लेलाई प्रमुख सञ्चालन अधिकृत तोकेको हो । अमेरिकाको चर्चित अटो निर्माता फोर्डले लगानीकर्तालाई आश्वस्त पार्न व्यवस्थापन हेरफेर गरेको हो । अब फेर्लेले नै विश्वव्यापी सञ्चालन हेर्नेछन् । फेर्लेलाई प्रमुख कार्यकारी जिम हेकेटको उत्तराधिकारी मानिएको छ ।

फेर्ले अहिले नयाँ व्यवसाय, प्रविधि र रणनीतिको प्रमुख थिए । फेर्लेको पदोन्नति मार्च १ देखि कार्यान्वयन हुनेछ । शुक्रबार कम्पनीको सेयरमा समेत गिरावट आएको थियो । पछिल्लो समय कम्पनीले एकपछि अर्को आर्थिक नोक्सानी व्यहोरिरहेको छ । चीनमा मात्रै कम्पनीले गत वर्ष ७७ करोड नोक्सानी व्यहोरेको थियो । सन् २०१८ यता कम्पनीले नोक्सानी व्यहोर्दै आएको छ ।