अमेरिकामा ब्याजदर बढ्ने डरमा एसियाली सेयरबजार

काठमाडौं।एसियाली सेयरबजार ओरालो लागेका छन् । अमेरिकी केन्द्रीय बैंकले ब्याजदरवृद्धिलाई निरन्तरता दिने बताएसँगै एसियाली सेयरबजारमा डर देखिएको हो । अमेरिकामा अहिले चरम महंगी छ । त्यसलाई रोक्न फेडेरल रिजर्भले ब्याजदर बढाउँदै आएको छ ।

फेड प्रमुख जेरोमी पवेलले केन्द्रीय बैंकको नीतिले केही परिवार र व्यवसायलाई असर गर्नसक्ने चेतावनी दिएका छन् । उच्च ब्याज हुँदा व्यक्ति र कम्पनीलाई सापटी महंगो हुने हुन्छ । यसले आर्थिक वृद्धि र महंगीलाई भने केही सुस्त पार्छ ।

जापानको निक्की २२५ सोमबार २.७ प्रतिशतले घटेको थियो । एसिया प्रशान्त क्षेत्रमा दक्षिण कोरियाको कोस्पी र अस्ट्रेलियाको एएसएक्स २०० दुवै दुई प्रतिशत हाराहारीले घटेका थिए भने हङकङको हाङसेङ शून्य दशमलव आठ प्रतिशतले ओरालो लागेको थियो । न्युयोर्कका मुख्य सूचकहरु शुक्रबार पवेलको चेतावनीसँगै तीन प्रतिशतभन्दा धेरैले घटेका थिए । विमिङको ज्याक्सन होलमा भएको एक सम्मेलनमा पवेलले आफ्नो धारणा राखेका थिए ।

सो क्रममा उनले फेडले ब्याजदर वृद्धिलाई निरन्तरता दिने बताएका थिए । यो आगामी महिनाहरुमा निरन्तर बढ्ने उनको भनाइ थियो । यसले अमेरिकी घरपरिवार र व्यवसायलाई समेत प्रभावित पार्ने उनले चेतावनी दिएका थिए । अहिले अमेरिकामा चार दशकयताकै चर्को मूल्यवृद्धि छ ।