अमेरिकी चिप प्लान्टमा ताइवानी कम्पनीको ४० अर्ब डलर लगानी

अमेरिका । कम्प्युटर चिप निर्माता टीएसएमसीले अमेरिकी ठूलो चिप प्लान्टमा आफ्नो लगानी तेब्बरले बढाउने भएको छ । कम्पनीले उक्त प्लान्टमा ४० अर्ब अमेरिकी डलर लगानी गर्ने भएको बीबीसीले जनाएको छ । यो अमेरिकी इतिहासकै सबैभन्दा ठूलोमध्येको विदेशी लगानी हो । अमेरिकी राष्ट्रपति जो बाइडेन र ताइवानी कम्पनीका मालिकले एरिजोना राज्यमा संयुक्त रुपमा कारखाना खोल्दै यस्तो घोषणा गरेका हुन् ।

बाइडेन प्रशासनले अब फोनदेखि सैन्य जहाजसम्मका लागि चाहिने मुख्य कुरा चिपको उत्पादन अमेरिकामै गर्न जोड दिइरहेको छ । टीएसएमसी विश्वकै ठूलो माइक्रो चिप निर्माता हो । जसका ग्राहक अन्य ठूला कम्पनीहरु रहेका छन् । त्यसमध्ये आइफोन निर्माता एप्पल समेत एक रहेको छ ।

एरिजोनाको प्लान्टले ३–एनएम र ४–एनएम चिप उत्पादन गर्नेछ जुन आईफोन प्रोसेसरमा प्रयोग हुन्छ । सेमिकन्डक्टर चिपहरुलाई कहिलेकाहीँ स्मार्टफोन, कार र एआई प्रविधिको मस्तिष्क पनि भनिन्छ । टीएसएमसीका प्रमुख मार्क ल्युले कम्पनीले दुईखाले सेमिकन्डक्टर फेब्रिकेसन प्लान्ट बनाउने बताए । जसमध्ये पहिलो सन् २०२४ सम्म बनिसक्नेछ । यसको कुल लगानी ४० अर्ब डलर लाग्नेछ । कम्पनीले ताइवान गरेको यो सबैभन्दा धेरै लगानी हो । यता बाइडेनका लागि पनि यो लगानी निकै ठूलो र महत्वपूर्ण रहेको छ । अमेरिका–चीन तनाव बढिरहेका बेला चिप अभावले आपूर्ति प्रणालीमा नै असर गर्ने गरेको छ ।

टीएसएमसीसँगको यो सम्झौता भने सन् २०२० मै भएको थियो जतिबेला डोनाल्ड ट्रम्प राष्ट्रपति थिए । पछिल्लो घोषणामा भने लगानीको आकार निकै बढेको हो ।