पाकिस्तानको मुद्रास्फीति दरमा नयाँ रेकर्ड

इस्लामाबाद । पाकिस्तानको मुद्रास्फीति दर ३७ दशमलव ९७ प्रतिशत पुगेको छ । मे महिनामा कायम यो मुद्रास्फीति दर हालसम्मकैे उच्च रहेको त्यहाँको तथ्यांक विभागले जनाएको छ ।

यसअघि अप्रिल महिनामा पाकिस्तानको मुद्रास्फीति दर ३६ दशमलव ५ प्रतिशत रहेको थियो । पछिल्लो समय पाकिस्तानमा आर्थिक संकट उत्पन्न हुँदै गएपछि त्यहाँको मुद्रास्फीति दर लगातार बढिरहेको छ । पाकिस्तानको यो मुद्रास्फीत दर दक्षिण एशियाकै सबैभन्दा उच्च हो । लगातार दोस्रो महिना मुद्रास्फीत दरले नयाँं रेकर्ड बनाएपछि पाकिस्तानमा आर्थिक संकट थप चुलिएकोे स्पष्ट देखिन्छ ।

आर्थिक संकट गहिरिँदै गएपछि पाकिस्तानमा ऋण ‘डिफल्ट’ को स्थिति आउनसक्ने सम्भावना गहिरिएको छ । एक साता अघि पाकिस्तान सरकारले ऋण तिर्नकै लागि मित्रराष्ट्रहरुसँग सहयोगका लागि अपील मागेको थियो ।

पाकिस्तान र अन्तर्राष्ट्रिय मुद्रा कोष (आईएमएफ)बीच बेलआउटका लागि वार्ता भइराखेको छ । तर उक्त वार्ता सफल हुन सकिरहेको छैन । पाकिस्तानले आईएमएफबाट थप ऋणको अपेक्षा गरिरहेको छ । आईएमएफले पाकिस्तानलाई सरकारी अनुदानफिर्ता लिन, बजारमा आधारित विनिमयदर कायम गर्न र करका नयाँ दरहरु कायम गर्न सुझाव दिँदै आएको छ ।