‘रेल दुर्घटनाको कारण पहिचान भएको छ’

नयाँ दिल्ली । भारतका रेलमन्त्री अश्विनी वैश्णवले भरखरै ओडिशामा भएको रेल दुर्घटना ‘सिग्नलमा त्रुटी’ भएका कारण भएको हुनसक्ने बताएका छन् । चार दशक यताकै सबैभन्दा घातक दुर्घटना भएको यस घटनाको कारण अझै स्पष्ट भने भइसकेको छैन ।

‘रेल दुर्घटनाका भयानक कारण र कारकहरू पत्ता लागेका छन् तर अनुसन्धान नसकिदै त्यो सार्वजनिक गर्नु उचित हुँदैन’ मन्त्री अश्विनीले भने, ‘हामीले दुर्घटनाको कारण र यसका पछाडिका जिम्मेवार व्यक्तिहरू पहिचान गरेका छौं ।’ दुर्घटनाको कारण पत्ता लगाउन पूर्णखालको अनुसन्धान सुरु गरिसकेको पनि उनले बताएका छन् ।

भारतको रेल बोर्डले दुर्घटना भएका बेला ‘सिग्नल’ दिने प्रणालीमा अवरोध आएपनि काम गरिरहेको जनाएको छ । सरकारी अधिकारीहरुले शनिबार भएकोे रेल दुर्घटनामा परी आइतबार साँझसम्म मृत्यु हुनेको संख्या दुई सय ७५ पुगेको बताएका छन् । एक हजार भन्दा बढी घाइते भएका छन् ।