बंगलादेशमा गर्मी बढ्यो, विद्युत् कटौतीसँगै विद्यालय बन्द

बंगलादेश । बंगलादेशमा आधा शताब्दीयताकै गर्मी बढेको छ । राजधानी ढाकाको तापक्रम ४० डिग्री सेल्सियस पुगेको छ । बंगलादेशको मौसम विभागले सन् १९७१ मा बंगलादेश स्वतन्त्र भएयता यतिलामो गर्मी कहिल्यै महसुस नभएको जनाएकोे छ ।

गर्मीका कारण दशौँ हजार विद्यालयहरू बन्द गरिएका छन् । मौसम विभागका वरिष्ठ अधिकारी बल्लुर रसिदले यतिलामो गर्मी आधा दशकयताकै पहिलो भएको बताएका हुन् ।

गर्मीका कारण बजारमा एयर कन्डिसनर र पङ्खाको माग बढेको छ । तर, त्यहाँको सरकारले कोइलामा खर्च गर्न असमर्थ भएका कारण सबैभन्दा ठूलो पावर प्लान्ट सञ्चालन हुन सकेको छैन । यही कारण बिजुली उत्पादनमा भारी कटौती गरिएको सरकारी अधिकारीहरूले बताएका छन् ।

गतवर्ष बंगलादेशी मुद्रा टाकाको मूल्य अमेरिकी डलरको तुलनामा २५ प्रतिशतले अवमूल्यन भएपछि इन्धनको लागत बढेको छ । यही कारण बंगलादेशले पर्याप्त कोइला आयात गर्न सकेको छैन । जसको असर विद्युत् उत्पादन गर्ने सबैभन्दा ठूलो प्लान्ट सञ्चालन रोक्नुपरेको बंगलादेशी सरकारले बताएको छ ।