१६औं राष्ट्रव्यापी कृष्णमोहन स्मृति खुुला ब्याडमिन्टन प्रतियोगिता हुने

काठमाडौं । नेपाल एपीएफ क्लबको आयोजनामा ‘१६औं राष्ट्रव्यापी कृष्णमोहन स्मृति खुुला ब्याडमिन्टन प्रतियोगिता–२०८०” सञ्चालन हुने भएको छ । यही जेठ २१ गतेदेखि २४ गतेसम्म हल्चोकस्थित नेपाल एपीएफ क्लबको कभर्ड हलमा प्रतियोगिता सञ्चालन हुने एपीएफले जनाएको छ ।

प्रतियोगिताका लागि ८ लाख ६५ हजार रुपैयाँको पुरस्कार राशि तोकिएको छ । प्रतियोगितामा पुरुष तथा महिला एकलमा प्र्रथम हुनेले ७० हजार रुपैयाँ, दोस्रो हुनेले ३५ हजार रुपैयाँ र तेस्रो हुनेले २५ हजार रुपैयाँ तथा क्वाटरफाइनमा पुग्ने प्रत्येकले टि–सर्ट प्राप्त गर्ने आयोजकले जनाएको छ । यस्तै, पुरुष तथा महिला युगलमा प्रथम पुरस्कार ५५ हजार, द्वितीय पुरस्कार ३० हजार र तृतीय पुरस्कार २० हजार रुपैयाँ रहेको आयोजकले जनाएको छ ।

प्रतियोगितामा समावेश इभेन्ट्सहरू पुरुष एकल, महिला एकल, पुरुष युगल, महिला युगल, १२ वर्षमुनिका केटा, १९ वर्षमुनिका केटा, भेट्रान्स युगल ४५÷५५ वर्ष, मिक्स डबल्स र इन्टर गभर्मेन्टल सर्भिसतर्फ ३५ वर्षमाथि युगल रहेका छन् । प्रतियोगितामा सहभागी हुने खेलाडीहरूले प्रतियोगितासम्बन्धी फारम तथा नियम नेपाल एपीएफ क्लब, सशस्त्र प्रहरी बल नेपालको वेबसाइट र नेपाल ब्याडमिन्टन संघबाट प्राप्त गर्नसक्ने आयोजकले जनाएको छ ।