पाल्पाका विद्यालयमा पढाइ सुरु

पवित्रा घिमिरे
तानसेन, साउन १४
कोभिड १९ को संक्रमणको त्रासका कारण गत चैतदेखि मुलुकभरका विद्यालयहरूको पठनपाठन बन्द रहेको बेला पाल्पाका विभिन्न विद्यालयले पढाउन सुरु गरेका छन् । कोभिड १९ को संक्रमण फैलिन नदिन गरिएको बन्दाबन्दीका कारण बन्द भएका विद्यालयले स्वास्थ्य मापदण्ड पूरा गर्दै विद्यालय सञ्चालनमा ल्याइएको विद्यालयले जनाएको छ ।

रामपुर नगरपालिकामा रहेका केही निजी विद्यालयले प्राथमिक तह माध्यामिक तहलाई पालोअनुसारको पढाइ सुरु गरेका छन् । निजी विद्यालय केहीले बिहान ७ बजेदेखि र केहीले ९ बजेदेखि सुरु गरेर कक्षा विभाजन गरी तीन/तीन घण्टा पढाइ सञ्चालन गरेका छन् । रामपुर अंग्रेजी आवासीय विद्यालयले बिहान हात धोएर, स्यानिटाइजर तथा मास्कको प्रयोग गरी विद्यालय पुगेका विद्यार्थीलाई एक बेञ्चमा दुईका दरले राखेर पढाउन सुरु गरेको छ ।

विद्यालयका प्रिन्सिपल अनन्त भण्डारीले विद्यालय समयमा एउटा कक्षाको विद्यार्थी अर्को कक्षाकासँग सम्पर्क नहुने तथा विद्यालय समयमा खाजा घर नखुल्ने र भीडभाड नहुने हुनाले उपयुक्त उपाय अपनाएर विद्यालय सञ्चालन गरिएको जानकारी दिए । लामो समयदेखि विद्यालय जान नपाएका विद्यार्थीहरू पनि अहिले पढ्न पाउँदा खुशी देखिन्छन् ।

सामुदायिक विद्यालयले गृहकार्य दिने तथा हप्तामा केही दिन बिराएर विद्यालयमै कक्षागत पालो लगाएर पढाइ सुरु गरेका जनाएका छन् । असार १७ गतेदेखि साउन ७ गतेसम्म टोल–टोलको विद्यार्थी जम्मा पारेर शिक्षकले पढाउने कार्य पनि झन्झटिलो भएकाले स्वास्थ सुरक्षा अपनाएर विद्यालय सञ्चालन गर्ने निर्णय भएको रामपुर नगर शिक्षा समितिले जनाएको छ । यसअघि पहिलो चरणमा टोल शिक्षण, दोस्रो चरणको कार्यक्रम परियोजना कार्य, गृहकार्य, टेलिफोन सम्पर्क तथा घरघरमा शिक्षक तथा तेस्रो चरणमा विद्यालयले सुरक्षाका उपाय अपनाउँदै, भौतिक दूरी कायम राखी तीन घण्टासम्म वैकल्पिक सिकाइ सहजीकरण गरिने रामपुर नगरपालिकाका नगरप्रमुख तथा नगर शिक्षा समितिका अध्यक्ष रमणबहादुर थापाले बताए ।

इन्टरनेटका माध्यमबाट अनलाइन कक्षा, टेलिभिजनको पढाइलाई निरन्तरता दिने, टेलिफोनबाट विद्यार्थीले शिक्षकसँग नबुझेको कुरा सोध्नसक्ने तथा नगरका प्रत्येक विद्यालयले विषयगत रूपमा विद्यार्थीका घर–घरमा पुगेर गृहकार्य दिने कार्य गरेकामा फेरि विद्यार्थीको भविष्यलाई ध्यानमा राख्दै कोभिड १९ को संक्रमणबाट सुरक्षित हुँदै विद्यालय सञ्चालन गरेको नगरप्रमुख थापाले बताए । पाल्पाको पूर्वखोला गाउँपालिकाले भने टोलटोलको पढाइलाई निरन्तरता दिएको छ । टोलमा रहेका भवन, क्वारेन्टाइन नबनाइएका विद्यालयमा पढाइ सञ्चालन गरेको पालिकाले छ । विद्यार्थी संख्या तथा शिक्षकको संख्याको आधारमा एउटा वडाको करिब ४० भन्दा बढी टोलमा विद्यार्थीलाई शिक्षा प्रदान गरिएको जनउज्वल आधारभूत विद्यालय अर्खलडाँडाका शिक्षक दिल्लीराज पँगेनीले बताए ।

अहिले एउटा टोलमा १० जनासम्म विद्यार्थी राखेर शिक्षा प्रदान गरिएको शिक्षाशाखा प्रमुख डिल्लीराज ढुङ्गानाले जानकारी दिए । पूर्वखोला गाउँपालिका पाल्पाले शिक्षक स्वयंसेवकसमेत परिचालन गरी शिक्षा प्रदानलाई व्यवस्थित बनाएको छ । निस्दी गाउँपालिका पाल्पाले पनि स्वास्थ्य सावधानी अपनाएर विद्यालय सञ्चालन गरेको छ । गाउँपालिका कोरोनाको सङ्क्रमितको संख्या नरहेको र अवस्था सामान्य नै रहेकोले स्वास्थ्य सावधानी अपनाएर विद्यालयमा नै पढाइ सञ्चालन गरिएको शिक्षा अधिकृत प्रमोद यादवले बताए ।

शिक्षा विकास तथा समन्वय इकाइ पाल्पाका सूचना अधिकारी विष्णु बेल्वासेले भने तीनदेखि चार लाखसम्म छपाइ समग्रीका लागि सरकारको सहयोगसमेत प्राप्त भएका र केही स्थानीय तहले सिकाइ व्यवस्थापन मिलाएको बताए । जिल्लाको रम्भा, रिब्दीकोट, रैनादेवी छहरा, माथागढी, तिनाउ गाउँपालिकासँगै तानसेन नगरपालिकामा पनि टोल–टोलमा पढाइ सञ्चालन भएकोे शिक्षा विकास तथा समन्वय एकाइ पाल्पाले जनाएको छ । बिस्तारै अन्य विद्यालयहरूले पनि पठनपाठन सञ्चालन गर्ने बनाएका छन् ।