Techie IT
आजको आर्थिक दैनिक

Aarthik Dainik

An Economic Newsportal

गृहपृष्ठनेपालसगरमाथा राष्ट्रिय निकुञ्जमा पहिलो चार महिनामा पर्यटन आवागमन तीन प्रतिशतमा सीमित

सगरमाथा राष्ट्रिय निकुञ्जमा पहिलो चार महिनामा पर्यटन आवागमन तीन प्रतिशतमा सीमित


सोलुखुम्बु ।
चालू आर्थिक वर्षको पहिलो चौमासिकमा सोलुखुम्बुको सगरमाथा राष्ट्रिय निकुञ्जमा पर्यटन आवागमन तीन प्रतिशतमा खुम्चिएको छ । चालू आर्थिक वर्षको पहिलो चौमासिकमा ६ सय ८८ जना पर्यटकले सगरमाथा राष्ट्रिय निकुञ्ज क्षेत्रको भ्रमण गरेका छन् । कोरोना कहरका बीच चालू आर्थिक वर्षको साउन, भदौ, असोज र कात्तिक महिनामा १ सय ३३ जना विदेशी र ५ सय ५५ जना स्वदेशी पर्यटकले निकुञ्जको भ्रमण गरेको कार्यालयको तथ्यांकमा उल्लेख छ ।

साउन र भदौमा शून्य बनेको पर्यटन गतिविधि असोज महिनामा १ सय ४६ स्वदेशी तथा २५ जना विदेशीले भ्रमण गरेका थिए भने कात्तिक महिनामा ४ सय ९ जना स्वदेशी तथा १ सय ८ जना विदेशी पर्यटकले भ्रमण गरेको सगरमाथा राष्ट्रिय निकुञ्ज कार्यालयका प्रमुख संरक्षण अधिकृत भूमिराज उपाध्यायले जानकारी दिए । अघिल्लो आर्थिक वर्षको पहिलो चौमासिकमा १७ हजार ५ सय ६६ विदेशी र ४ सय ८८ स्वदेशी गरी १८ हजार ५४ जना पर्यटकले निकुञ्ज क्षेत्रको भ्रमण गरेको कार्यालयले जनाएको छ ।

यसरी हेर्दा गत आर्थिक वर्षको पहिलो चौमासिकको तुलनामा चालू आर्थिक वर्षमा पर्यटक आगमन तीन प्रतिशतमा खुम्चिएको उपाध्यायको भनाइ छ । कोरोना महामारीका कारण पछिल्लो समय खुम्बु क्षेत्रमा विदेशी पर्यटकको आवागमन शून्यप्रायः रहेको छ । आम्दानीको मुख्य स्रोत नै पर्यटन व्यवसाय रहेको खुम्बु क्षेत्रको आर्थिक अवस्था सुनसानजस्तै बनेको व्यवसायीको भनाइ छ । सरकारले पर्यटन व्यवसायीलाई राहतको व्यवस्था गर्नुपर्ने व्यवसायीहरुले माग राख्दै आएका छन् ।


क्याटेगोरी : नेपाल

तपाईको प्रतिक्रिया