नेपाल स्टारको उपाधि एलिना गुरुङ्गलाई

काठमाडौं ।
वाइवाइ नेपाल स्टारको उपाधि पोखराकी एलिना गुरुङ्गले जित्न सफल भएकी छिन् । नेपाल टेलिभजनको प्रस्तुतिमा कि इन्टरटेनमेन्ट एण्ड रिसर्च प्रालिले उत्पादन गरी प्रसारणमा ल्याएको नेपालको आफनै सांगीतिक रियालिटी शोको पहिलो सिजनको अन्तिम प्रतिस्पर्धा शनिबार राति भएको थियो ।

नेपाल टेलिभिजनबाट प्रत्यक्ष प्रसारण भएको यो ग्राण्ड फिनाले सञ्चार, सूचना तथा प्रविधिमन्त्री पार्वत गुरुङ्गको प्रमुख आतिथ्यमा नेपाल टेलिभिजनको तीन सय स्टुडियोमा भव्य समारोहका बीच कार्यक्रम भएको थियो ।

कार्यक्रममा नेपाली गीत संगीत नेपालको संस्कार, संस्कृतिलाई विश्वको कुना कुनामा चिनाउने एक सशक्त माध्यम भएको मन्त्री गुरुङले बताए । नेपाल टेलिभिजन क्रमशः अत्याधुनिक कार्यक्रमहरु प्रविधिसँग घुलमेल गर्दै आम दर्शकसामु पस्किन पाउँदा अत्यन्त गौरवान्वित भएको महशुस भएको नेपाल टेलिभिजनका कार्यकारी अध्यक्ष महेन्द्र विष्टले बताए ।

सांगीतिक रियालिटी शो वाइवाइ नेपाल स्टारको अडिसन नेपालको सातवटै प्रदेशमा भएको थियो । नेपाल स्टारको मुख्य प्रायोजकको रुपमा वाइवाइ, वृज सिमेन्ट तथा सिद्धार्थ बैंक रहेको थियो भने अन्य प्रायोजकहरुमा रिलायन्स लाइफ इन्स्योरेन्स, सिद्धार्थ इन्स्योरेन्स, हरपल चामल तथा यति कार्पेट रहेका थिए ।

वाइवाइ नेपाल स्टारको अन्तिम प्रतिस्पर्धामा रहेका पोखराकी एलिना गुरुङ्ग, ताप्लेजुङ्गका लक्ष्मण लिम्बु, काठमाडौंका सुरेश लामा तथा धरानका सन्देश बम्जन लामा थिए । यी अन्तिम प्रतिस्पर्धाका चारै जनाले जनही पाँच/पाँच लाखका दरले नगद प्राप्त गरका थिए भने वाइवाइ नेपाल स्टार बन्न सफल पोखराकी एलिना गुरुङ्गले थप ३० लाखसहित ३५ लाख रुपैयाँ नगद जितेकी छिन् ।

वाइवाइ नेपाल स्टार २०७६ फागुन २४ गते शनिबारका दिनदेखि नेपाल टेलिभिजनबाट प्रसारण सुरु भएको थियो । यस रियालिटी शोका निर्णायकहरु गायक रामकृष्ण ढकाल, गायिका अन्जु पन्त र संगीतकार आलेकश्री रहेका थिए ।