स्रोत नखुलेको ११ लाख ५० हजार रुपैयाँसहित दुई जना पक्राउ

मोरङ ।
सशस्त्र प्रहरी बलले स्रोत नखुलेको ११ लाख ५० हजार रुपैयाँसहित दुई जनालाई पक्राउ गरेको छ । विराटनगर महानगरपालिका १६ दरैयास्थित सीमा इलाकाबाट आइतबार एपीएफ टोलीले उक्त रकमसहित दुई जनालाई पक्राउ गरेको हो । विराटनगर महानरपालिका १६ दरैया बस्ने २३ वर्षीय अमोद यादव र भारतमा घर बताउने १८ वर्षीय अभिषेक चौधरी छन् ।

सशस्त्र प्रहरी बल नेपाल बोर्डर आउट पोष्ट रानी र सशस्त्र प्रहरी बल नेपाल बोर्डर आउट पोष्ट दरैयाबाट खटिएको एपीएफ टोलीले उनीहरूलाई भारतबाट नेपालतर्फ लुकिछिपी आउँदै गरेको अवस्थामा पक्राउ गरेको हो । उनीहरूमाथि शंका लागि जाँच गर्दा उनीहरूको साथमा फेला परेको रुपैयाँको स्रोत खुलाउन नसकेपछि रुपैयाँसहित पक्राउ गरिएको प्रहरीले जनाएको छ । एपीएफ टोलीले यादवको साथमा पाँच लाख रुपैयाँ र चौधरीको साथमा छ लाख ५० हजार रुपैयाँ फेला पारेको हो ।