दक्षिण एसियाली किकबक्सिङ प्रतियोगितामा भाग लिन नौ सदस्यीय नेपाली टोली भुटान प्रस्थान

काठमाडौं । भुटानमा हुनलागेको पाँचौँ दक्षिण एसियाली किकबक्सिङ प्रतियोगितामा भाग लिन नौ सदस्यीय नेपाली टोली त्यसतर्फ प्रस्थान गरेको छ । उनीहरूलाई राष्ट्रिय खेलकुद परिषद्का सदस्यसचिव टंकलाल घिसिङले एक कार्यक्रमको आयोजना गरी बिदाइ गरेका थिए ।

सदस्यसचिव घिसिङको बिदाइपश्चात् उनीहरू बिहीबार भुटान गएका हुन् । नेपाल सो–क्योकुसिन कराँते संघले उक्त प्रतियोगितामा भाग लिनका लागि देशभरबाट छनोट भएका छ जना खेलाडी र तीन जना अफिसियल कर्मचारीलाई भुटान पठाएको हो । भुटानमा यही अगष्ट २० र २१ मा निङ्गा स्पोर्ट फेरेडेसन तथा इन्टरनेसनल अल स्पोट्र्स गेम फेरेडेसनको संयुक्त आयोजनामा उक्त प्रतियोगिता हुनलागेका हो ।

प्रतियोगितामा भाग लिन नेपालबाट राजकुमार श्रेष्ठ, जगत बहादुर धामी, भुवन हायू, दल बहादुर घले, मुकेश लुईँटेल, जयराम ब्लोन, कविन देसाई, सिवानी श्रेष्ठ र कसिस कुमारी क्षेत्री भुटान गएको नेपाल सो–क्योकुसिन कराँते संघका अध्यक्ष राज कुमार श्रेष्ठले जनाकारी दिए ।