‘नक्कली मोही’ बनेर जग्गा हिनामिना गरेको आरोपमा पक्राउ

काठमाडौँ । सकलानन्द महर्जन र सञ्जय महर्जन दाजुभाइ बालुवाटारस्थित ‘ललिता निवासको १४७ रोपनी सरकारी जग्गा हिनामिना प्रकरणमा थुनिएका छन् । उनीहरूलाई ललितपुरको कुपण्डोलबाट केन्द्रीय अनुसन्धान ब्युरोले साउन ८ गते पक्राउ गरेको थियो ।

केन्द्रीय अनुसन्धान ब्युरोका एसएसपी दिनेश आचार्यले ‘नक्कली मोही’ बनेर जग्गा हिनामिना गर्न उनीहरूको संलग्नता देखिएको बताएका छन् । ललिता निवास क्याम्प भित्रको २ रोपनी १२ आना जग्गा मोहियानी हक बापत महर्जन परिवारको नाममा ल्याएको भेटिएको छ ।

‘पशुपति टिकिन्छा गुठी’ नामको नक्कली गुठी खडा गरेर महर्जन परिवारलाई ‘मोही’ कायम गर्ने भूमिका रामकुमार सुवेदीको थियो । बिचौलिया रामकुमार सुवेदीले २०६३ सालमा जग्गा महर्जन परिवारको नाममा आएपछि ‘निजलाई नै बिक्री गर्नुपर्ने शर्त’ राखेर ७५ हजार बैना दिएर पशुपति टिकिन्छा गुठीको नाममा दर्ता कायम गरेका थिए ।