प्रधानन्यायाधीशमा श्रेष्ठ सिफारिस

काठमाडौं । प्रधानन्यायाधीशमा विश्वम्भरप्रसाद श्रेष्ठको नाम सिफारिस भएको छ । संवैधानिक परिषद्को बिहीबार बसेको बैठकले प्रधानन्यायाधीशमा सर्वोच्च अदालतका वरिष्ठतम न्यायाधीश श्रेष्ठको नाम सिफारिस गरेको हो ।

प्रधानमन्त्री कार्यालय सिंहदरबारमा बसेको परिषद्को बैठकले प्रधानन्यायाधीशमा श्रेष्ठको नाम सिफारिस गरेको हो । न्याय परिषद्ले प्रधानन्यायाधीशका लागि श्रेष्ठसहित ११ जनाको रोस्टर पठाएको थियो । रोस्टरको पहिलो नम्बरमा रहेका श्रेष्ठको नाम सिफारिस गरेको हो । अब श्रेष्ठको नाम संसदीय सुनुवाइ विशेष समितिमा जानेछ । समितिबाट नाम अनुमोदन भएमा श्रेष्ठ ३१औँ प्रधानन्यायाधीश बन्नेछन् । उनको कार्यकाल २०८१ असोजसम्म हुनेछ । वर्तमान प्रधानन्यायाधीश हरिकृष्ण कार्कीले उमेर हदका कारण यही साउन २० गते अनिवार्य अवकाश लिनेछन् ।