माओवादी बैठकको तेस्रो दिन केन्द्रीय सदस्यले धारणा राख्नेक्रम सुरु

काठमाडौं । कमलादीस्थित नेपाल प्रज्ञा–प्रतिष्ठानमा नेकपा (माओवादी केन्द्र)को जारी केन्द्रीय समितिको बैठकको तेस्रो दिन शुक्रबार पनि केन्द्रीय सदस्यले धारणा राख्नेक्रम सुरु भएको छ ।

बैठकमा पार्टी अध्यक्ष एवं प्रधानमन्त्री पुष्पकमल दाहाल ‘प्रचण्ड’ले पेस गरेको ‘वर्तमान परिस्थिति र पार्टीका प्रमुख कार्यभारहरू’ शीर्षकको राजनीतिक एवं सङ्गठनात्मक प्रस्तावमाथि केन्द्रीय सदस्यले धारणा राखेका छन् ।

बैठकमा तीन सय ८७ पूर्ण र एक सय ९६ वैकल्पिक केन्द्रीय सदस्य, अनुशासन, लेखा र निर्वाचन आयोगका ४१ सदस्य तथा सात भौगोलिक र तीन गैरभौगोलिक गरी १० प्रदेशका ९० पदाधिकारीको सहभागिता छ । बुधबारदेखि सुरु भएको बैठकमा बिहीबारसम्म ७४ जनाले अध्यक्षको प्रस्तावमाथि धारणा राखिसकेका छन् ।